---
ބޮޑު ކަންނެލީ މަސްވެރިންގެ ޔޫނިއަންގެ ފަރާތުން ކުރިއަށް ގެންދިޔަ އިހުތިޖާޖުގެ ތެރެއިން ސިފައިންގެ ލޯންޗެއްގައި ޖެއްސި މައްސަލަ ތަހުގީގު ކުރަން ފަށައިފިއެވެ.
ބޮޑު ކަންނެލީ މަސްވެރިންގެ ޔޫނިއަންގެ ފަރާތުން އިހުތިޖާޖު ކޮށްފައިވަނީ މިފްކޯއިން ބޮޑުކަންނެލި ގަތުމަށާއި ލޭނު އަޅައިގެން މަސްވެރިކަން ކުރުމުގެ ހުއްދަ ދިނުމުގެ ވިސްނުން ސަރުކާރުން ދޫކޮށްލުމަށް ގޮވާލައެވެ. މިމަހުގެ 12 ވަނަ ދުވަހު މަސްވެރިން އެންމެ ފުރަތަމަ އިހުތިޖާޖު ކޮށްފައިވަނީ ހުޅުމާލޭ ފަޅު ތެރޭގައެވެ. އޭގެ ފަހުން މަސްވެރިން ވަނީ މާލޭގެ އެއް ނަންބަރު ފާލަމަށް ވަދެފައެވެ.
މަސްވެރިންގެ މާލޭގެ އެއް ނަންބަރު ފާލަމަށް ވަންނަން މަސައްކަތް ކުރަމުން ދިޔަ ވަގުތު ކޯސްޓް ގާޑުން ދިޔައީ މަސްވެރިން ހުއްޓުވުމަށް މަސައްކަތް ކުރަމުންނެވެ. އެގޮތުން ކޯސްޓް ގާޑުގެ ލޯންޗުގައި އެއް ނަންބަރު ފާލަމަށް ވަންނަ ނެރު ކައިރީ ފުލުހުން ބަންދު ކުރިއެވެ. ނަމަވެސް ބައެއް ދޯނިތަކުން ވަނީ ކޯސްޓް ގާޑުގެ ލޯންޗުގައި ޖައްސައި އެއް ނަންބަރު ފާލަމަށް ވަދެފައެވެ.
މިމައްސަލަ ތަހުގީގު ކުރަމުން އަންނަތޯ "ވަގުތު" އިން ސުވާލު ކުރުމުން ފުލުހުންގެ މީޑިއާ އޮފިޝަލް ވިދާޅުވީ، އެއީ ކަނޑުމަތީ ހާދިސާއެއް ކަމުން މެރިން ޕޮލިހުން މައްސަލަ ތަހުގީގު ކުރަމުން އަންނަ ކަމަށެވެ.
މީސްމީޑިއާގައި އާންމުވެފައިވާ ވީޑިއޯތަކުން ފެނިގެން ދަނީ މަސްވެރިންގެ ދޯންޏަކުން ކޯސްޓް ގާޑުގެ ލޯންޗެއްގައި ޖައްސައި ކުރިއަށް ގެންދާ މަންޒަރެވެ. އަދި އެވަގުތު ފުލުހުން އެ ދޯނި މަޑުކުރަން އެންގުމުން ވެސް ފަޅު ތެރެއަށް ވަދެގެން އައި މަންޒަރު ފެނިގެންދެއެވެ.
ކޮމެންޓް