ފުލުސް އޮފީސް ހިންގުން ވަގުތީ ގޮތުން ފަރުހާދުއާ ހަވާލުކޮށްފި

ފުލުސް އޮފީސް ހިންގުން ވަގުތީ ގޮތުން ޑެޕިއުޓީ ކޮމިޝަނާ އޮފް ޕޮލިސް ފަރުހާދު ފިކުރީއާ ހަވާލު ކުރައްވައިފި އެވެ.

ފަރުހާދު އާ އެ މަސްއޫލިއްޔަތު ހަވާލު ކުރެއްވީ ކުރިން އެ މަގާމުގައި ހުންނެވި އަލީ ސުޖާއު މިއަދު ކުއްލި ގޮތަކަށް އިސްތިއުފާ ދެއްވުމުންނެވެ.

ހޯމް މިނިސްޓަރު އަލީ އިހުސާން ކުރެއްވި އެކްސް ޕޯސްޓެއްގައި ވިދާލުވީ ކަމިޝަނާ އޮފް ޕޮލިސް އަލީ ޝުޖާއު އެމަގާމުން މިއަދު އިސްތިއުފާ ދެއްވުމާއި ގުޅިގެން ދިވެހި ފުލުހުންގެ ހިދުމަތުގެ ގާނޫނުގައިވާ ގޮތުގެ މަތިން ކަމިޝަނާ އޮފް ޕޮލިސްގެ މަސްއޫލިއްޔަތު ވަގުތީގޮތުން އަދާ ކުރެއްވުމަށް ޑެޕިއުޓީ ކަމިޝަނާ އޮފް ޕޮލިސް ފަރުހާދު ފިކުރީ ކަނޑައަޅާފައިވާ ކަމަށެވެ.

މީގެ ކުރިން ވެސް ވަނީ ފުލުހުންގެ ހިދުމަތް ވަގުތީ ގޮތުން ހިންގަން، ފަރުހާދާ ހަވާލުކުރައްވާފަ އެވެ. އެއީ އޭރު ކޮމިޝަނާ އޮފް ޕޮލިސްގެ މަގާމުގައި ހުންނެވި މުޙައްމަދު ހަމީދު ރިޓަޔާ ކުރެއްވުމުންނެވެ.

ސުޖާއު މިއަދު އިސްތިއުފާ ދެއްވާފައި މިވަނީ މި މަހުގެ 18 ވަނަ ދުވަހުގެ ފަތިހު، މާލޭ ގެއެއްގެ ފުރާޅު މައްޗަށް ގަލޮޅު ރަނައުރާގެއާގެ، ހައްވާ ޔުމްނު ރަޝީދު, 21, ވެއްޓުނު މައްސަލައިގައި ފުލުހުން ހިންގާ ތަހުގީގުގެ މިނިވަންކަމާމެދު ގިނަ ބަޔަކު ސުވާލު އުފައްދަމުން އަންނަނިކޮށެވެ.

އޭގެ އިތުރުން ޔުމްނު އަށް އިންސާފު ހޯދައި ދިނުމަށް ގޮވާލައި ގިނަ އަދަދެއްގެ ޒުވާނުން މަގުމަތީގައި ކުރަމުން އަންނަ ސިލްސިލާ މުޒާހަރާ ތަކުގައި ހޯމް މިނިސްޓަރު އަލީ އިހުސާނާއި ޓްރާންސްޕޯޓް މިނިސްޓަރު މުޙައްމަދު އަމީން އަދި ސީޕީ ސުޖާއު، އިސްތިއުފާދެއްވުމަށް ވެސް އަންނަނީ ގޮވަމުންނެވެ.