ޕާޓާގެ އަހަރީ ބައްދަލުވުމާއި ސަމިޓުގައި ރާއްޖެ ބައިވެރިވެއްޖެ

ޕާޓާގެ އަހަރީ ބައްދަލުވުމާއި ސަމިޓުގައި ރާއްޖެއިން ބައިވެރިވެއްޖެ އެވެ.

ތުރުކީވިލާތުގެ އިސްތަންބުލްގައި ބޭއްވުނު ޕެސިފިކް އޭޝިއާ ޓްރެވަލް އެސޯސިއޭޝަން (ޕާޓާ) ގެ އަހަރީ އާންމު ޖަލްސާ އާއި އަހަރީ ސަމިޓުގައި ރާއްޖޭގެ ފަރާތުން ބައިވެރިވީ ޓޫރިޒަމް މިނިސްޓްރީގެ ޑެޕިއުޓީ މިނިސްޓަރު މީނާސް ޝައުގީ އާއި ޓޫރިޒަމް ރިސާޗް އެންޑް ސްޓެޓިސްޓިކްސްގެ ޑިރެކްޓަރު މަރިޔަމް ޝަރުމީލާ އެވެ.

މި ބައްދަލުވުންތައް ބޭއްވުނީ 21 އިން 23 އޭޕްރިލް 2023 އަށެވެ. މި ބައްދަލުވުން ތަކުގައި ދުނިޔޭގެ އެކި ކަންކޮޅު ތަކުން ޓޫރިޒަމް ދާއިރާގެ މާހިރުން އެއްތަނަކަށް އެއްވެ، ދެމެހެއްޓެނިވި ގޮތެއްގައި ފަތުރުވެރިކަން ކުރިއެރުވުމާއި، އައު ގޮތްތައް ހޯދުމާއި، އެންމެންނަށް ހަމަހަމަ ފުރުސަތު ދިނުމާއި، ތަފާސްހިސާބުގެ މައްޗަށް ބިނާކޮށް ފަތުރުވެރި ކަމުގެ ޑިމާންޑް އިތުރު ކުރުމާއި ފަތުރުވެރިންގެ ތަޖުރިބާ ރަނގަޅު ކުރުމާ ގުޅޭ ގޮތުން މަޝްވަރާ ކުރެވުނެވެ.

ޓޫރިޒަމް މިނިސްޓްރީން ބުނެފައި ވަނީ މި ބައްދަލުވުން ތަކުގައި ދިވެހި ވަފުދު ބައިވެރިވުމަކީ ރާއްޖޭގެ ފަތުރުވެރި ކަމުގެ ސިނާއަތަށް ވަރަށް މުހިންމު ކަމެއް ކަމަށެވެ. އަދި މިފަދަ ބައްދަލުވުން ތަކުން ލިބޭ މައުލޫމާތާއި ތަޖުރިބާ ބޭނުން ކޮށްގެން ރާއްޖޭގެ ފަތުރުވެރިކަން އިތުރަށް ކުރިއެރުވުމަށް މަސައްކަތްކުރާނެ ކަމަށް ވެސް ބުންޏެވެ.

"މި ސަމިޓުގައި ކުރިއަށް އޮތް އަހަރު ތަކުގައި ފަތުރުވެރި ކަމުގެ ދާއިރާ ކުރިއަރުވާނެ ގޮތްތަކާ މެދު މަޝްވަރާ ކުރެވުނު،" މިނިސްޓްރީން ބުންޏެވެ.

މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓް