ގައުމު ގައުމެއްގެ ގޮތުގައި ދެމިއޮތުމަށް އެންމެ މުހިއްމީ ދާހިލީ ސަލާމަތާއި ރައްކާތެރިކަން: އިހުސާން

ގައުމު ގައުމެއްގެ ގޮތުގައި ދެމިއޮތުމަށް އެންމެ މުހިއްމީ އެ ގައުމެއްގެ ދާހިލީ ސަލާމަތާއި ރައްކާތެރިކަން ހަމަޖެހިފައި އޮތުން ކަމަށް ހޯމް މިނިސްޓަރު އަލީ އިހުސާން ރޭ ވިދާޅުވެއްޖެ އެވެ.

ފުލުހުންގެ ހިދުމަތުގެ 92 ވަނަ އަހަރީ ދުވަހުގެ ޖަލްސާގައި ވާހަކަފުޅު ދައްކަވަމުން އިހުސާން ވިދާޅުވީ ރާއްޖެއަކީ މުޅި އިގުތިސޯދު ގައުމުގެ ހަމަޖެހުމުގެ މައްޗަށް ބިނާވެފައި އޮތް ރާއްޖެއެއް ކަމަށެވެ. އަދި އިންވެސްޓަރުންގެ ޔަގީންކަމުން ފެށިގެން ރައްޔިތުންގެ އުފާވެރިކަމާއި ހިތްހަމަޖެހުން ބިނާވެފައި ވަނީ އެ އިހުސާސްގެ މައްޗަށް ކަމަށް ވެސް ވިދާޅުވި އެވެ.

މަސްތުވާތަކެތި ބޭނުން ކުރާ ފަރާތް ތަކުގެ ސަބަބުން ކުށުގެ ވެއްޓަށް ބޮޑެތި ބަދަލު ތަކެއް އައިސްފައިވާ ކަން ފާހަގަ ކުރައްވައި އެ މަނިކުފާނު ވިދާޅުވީ އެ ތަކެތި ބޭނުން ކުރާ މީހުންނާއި އެ މީހުންގެ އާއިލާތައް، ދިރއުޅެމުން އަންނަނީ ވޭނާއި އުނދަގުލުގައި ކަމަށެވެ.

"މަސްތުވާތަކެތީގެ ވިޔަފާރީގެ މުގާބިލުގައި ކުށް ކުރާ ގޭންގުތައް އުފެދި މުޖުތަމައު ހަމަނުޖެހުމުގެ ތެރެއަށް ވަނީ އައިސްފައި،'' އިހުސާން ވިދާޅުވި އެވެ.

މައުސޫމު އެތަކެއް ފުރާނަ ތަކެއް ދިޔައީ މި މާހައުލުގެ ޝިކާރައަކަށް ވަމުން ކަމަށާއި ތުއްތު ކުދިން ދިޔައީ ކުށުގެ ވެއްޓަށް ހުށަހެޅެމުން ކަމަށާއި ކުށްކުރާ ކުޑަކުދިން، ކަންބޮޑުވާން ޖެހޭ މިންވަރަށް އިތުރުވަމުންދިޔަ، ކަމަށް ވެސް އެ މަނިކުފާނު ވިދާޅުވި އެވެ.

އޭގެ އިތުރުން، ރާއްޖޭގެ އިޖުތިމާއީ ހަމަޖެހުމަށް އެންމެބޮޑު ނުރައްކަލަކަށްވެފައި ވަނީ ގަވާއިދާ ހިލާފަށް އުޅެމުންދާ ބިދޭސީންގެ ފަރާތުން ކުށުގެ ވެއްޓަށް ބޮޅު ތަކެއް އިތުރުވެފައިވުމުން ކަމަށް ވިދާޅުވި އެވެ. އަދި މުޖުތަމައުގައި ހުރި މިފަދަ މައްސަލަ ތަކަށް މީގެކުރިން އެކަށީގެންވާ ހައްލެއް ގެނެވޭނެ ކަމުގެ އުންމީދެއް ރައްޔިތުންނަށް ލިބިފައިނުވާ ކަމަށް ވެސް އެމަނިކުފާނު ވިދާޅުވި އެވެ.

އަދި ކުރިއަށް އޮތް އަހަރަކީ ފުލުހުންގެ މަސައްކަތް ތަކުގައި ތަފާތު ފެންނާނެ އަހަރެއް ކަމަށާއި ދިވެހި ފުލުހުންގެ ހިދުމަތް ރައްޔިތުންނަށް އެންމެ އެދެވޭ ގޮތަށް ނަތީޖާ ފެންނާނެ އަހަރެއް ކަމަށް އިހުސާން ވިދާޅުވި އެވެ.

ފުލުހުންގެ ހިދުމަތް އިތުރަށް ތަރައްގީކޮށް، އިފެކްޓިވް ކުރުމަށް ޓަކައި އަހަރު ނިމުމުގެ ކުރިން ރާއްޖޭގެ ހުރިހާ ރަށެއްގައި ފުލުހުންގެ ހިދުމަތް ގާއިމު ކުރުމަށް ފުލުހުންގެ ތާރީހުގައި ހިންގޭ އެންމެ ބޮޑު އުމްރާނީ ތަރައްގީގެ މަޝްރޫއު މިދިޔަ މަހުގައި ފެށިފައިވާ ކަމަށް ވެސް މިނިސްޓަރު އިހުސާން ވިދާޅުވި އެވެ.