މަސްޖިދުއް ނަބަވީގެ އިމާމު ރައީސްގެ އަރިހަށް އިހުތިރާމުގެ ޒިޔާރަތެއް ކުރައްވައިފި

މަސްޖިދުއްނަބަވީގެ އިމާމު ޑރ. ސަލާހުލްބުދައިރު، ރައީސް ޑރ. މުޙައްމަދު މުއިއްޒުގެ އަރިހަށް އިހުތިރާމުގެ ޒިޔާރަތެއް ކުރައްވައިފި އެވެ. މި ބައްދަލުވުން އޮތީ މިއަދު ހެނދުނު ރައީސުލްޖުމްހޫރިއްޔާގެ އޮފީހުގަ އެވެ.

މި ބައްދަލުކުރެއްވުމުގައި ރައީސް، ސަލާހުލްބުދައިރަށް މަރުހަބާ ދަންނަވާ، ސައުދީ ޢަރަބިއްޔާއާއި ރާއްޖޭގެ ގުޅުމުގެ މައްޗަށް އަލިއަޅުއްވާލެއްވި އެވެ. އަދި، މިދަތުރުފުޅަކީ ދެ ގައުމުގެ ގުޅުން އިތުރަށް ބަދަހި ކުރުމުގައި އެޅިގެންދާ މުހިންމު ފިޔަވަޅެއްގެ ގޮތުގައި ރައީސް ސިފަ ކުރެއްވި އެވެ.

ރައީސްގެ ވާހަކަފުޅުގައި، ސަލާހުލްބުދައިރުގެ މި ދަތުރުފުޅަކީ، ވޭތުވެދިޔަ 41 އަހަރުގެ ތެރޭގައި މަސްޖިދުއްނަބަވީގެ އިމާމަކު ރާއްޖެއަށް ޒިޔާރާތް ކުރެއްވި ފުރަތަމަ ފަހަރުކަން ވެސް ފާހަގަ ކުރެއްވި އެވެ.

ޑރ. ސަލާހުލް ބުދައިރުގެ ވާހަކަފުޅުގައި އެ މަނިކުފާނަށް ރާއްޖެއިން އެރުވި ދައުވަތާއި މެހެމާންދާރީއަށް ޝުކުރު ދެންނެވި އެވެ. އަދި، ދެ ގައުމުގެ މެދުގައި އޮތް ގުޅުމަކީ އިސްލާމީ ވަހުދަތުގެ މައްޗަށް ބިނާވެފައި އޮތް ގުޅުމެއްކަމަށް ވިދާޅުވެ، އެގުޅުން އިތުރަށް ހަރުދަނާ ކުރުމާއި ބެހޭގޮތުން އެ މަނިކުފާނު ވާހަކަފުޅު ދެއްކެވި އެވެ.

މި ބައްދަލުކުރެއްވުމުގައި އެމަނިކުފާނު ވަނީ، ސައުދީ ރަސްގެފާނު، ސަލްމާން ބިން ޢއަ ދުލްއަޒީޒް އަލްސައޫދު އާއި އެ ގައުމުގެ ވަލީއަހުދު ބޮޑުވަޒީރު މުޙައްމަދު ބިން ސަލްމާން ބިން އަބްދުލްއަޒީޒު އަލްސައޫދު ގެ ހެޔޮ އެދުންތައް ރައީސުލްޖުމްހޫރިއްޔާ އަށް އަރިސް ކުރައްވާފަ އެވެ.

ރައީސްގެ ވާހަކަފުޅުގައި ރާއްޖޭގެ ތަރައްގީގައި، ހާއްސަކޮށް އިސްލާމީ ތައުލީމު ފުޅާ ކުރުމުގައި، ސައުދީ ދައުރުގެ މައްޗަށް އަލިއަޅުއްވާލެއްވި އެވެ. އަދި ހައްޖާއި އުމްރާގެ އަޅުކަމުގެ އިންތިޒާމުތައް ފަސޭހަކޮށްދިނުމާއި، ހައްޖާއި އުމްރާވެރިންނަށް ސައޫދީ ސަރުކާރުން ފޯރުކޮށްދެމުންދާ މެހެމާންދާރީއަށް ރައީސް، ހާއްސަ ޝުކުރެއް ދެންނެވި އެވެ.

ދެ ބޭފުޅުންގެ މި ބައްދަލުކުރެއްވުން ނިންމަވާލައްވާފައި ވަނީ، މަސްޖިދުއް ނަބަވީގެ އިމާމުގެ މި ތާރީހީ ދަތުރުފުޅުގެ ސަބަބުން ރާއްޖެ އާއި ސައުދީ އަރަބިއްޔާގެ ގުޅުން އިތުރަށް ބަދަހިވެގެންދާނެ ކަމަށް އުއްމީދު ކުރައްވަމުންނެވެ.