ރައީސްގެ އެދުމަކީ އޯލެވެލް ހަދާ ދަރިވަރުންނަށް ފާގަތި ދުވަސްތަކަކަށް އިމްތިހާނުގެ މުއްދަތު ވުން

އެ މަނިކުފާނު އެދެނީ އޯލެވެލްގައި ރާއްޖެއިން ބައިވެރިވި ހުރިހާ ދަރިވަރުންނަށް ވެސް ހިތްހަމަޖެހޭ ފާގަތި ދުވަސްތަކަކަށް އިމްތިހާނުގެ މުއްދަތު ވުން ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.

އެ މަނިކުފާނު މިހެން ވިދާޅުވީ އޯލެވެލް އިމްތިހާނު މިއަދު ފެށުމާ ގުޅުވައިގެން ސޯޝަލް މީސްމީޑިއާގައި ކުރެއްވި ޕޯސްޓެއް ގައެވެ.

ރައީސް ވަނީ މި އަހަރުގެ އޯލެވެލް އިމްތިހާނަށް ތައްޔާރު ވުމަށް، ހުރިހާ ދަރިވަރުން ކުރި ބުރަ މަސައްކަތުގައި މާތްﷲ ބަރަކާތް ލެއްވުން އެދި ދުއާ ދަންނަވާފަ އެވެ.

އަދި އެދިވަޑައިގަންނަވަނީ އެސްއެސް ސީ އަދި އޯލެވެލްގައި ރާއްޖެއިން ބައިވެރިވި 8364 ދަރިވަރުންނަށް ވެސް ހިތްހަމަޖެހޭ ފާގަތި ދުވަސް ތަކަކަށް އިމްތިހާނުގެ މުއްދަތު ވުން ކަމަށް ވެސް ރައީސް ވިދާޅުވި އެވެ.

އޭގެ އިތުރުން ތޫނުފިލިކަމާއެކު، ފަސޭހައިން ސުވާލު ތަކަށް ޖަވާބުދެވޭ، އަދި ބެލެނިވެރީންނާއި ސުކޫލް ތަކުން އުންމީދު ކުރާ ފަދަ ރަނގަޅު ނަތީޖާއެއް ހާސިލު ކުރުމަށް ދަރިވަރުންގެ ކިބައިން އެ މަނިކުފާނު އެދިވަޑައިގެންނެވި އެވެ.

ރައީސްގެ ޕޯސްޓް ނިންމަވާލައްވަމުން ވަނީ އޯލެވެން އިމްތިހާނުގައި ބައިވެރިވާ ކޮންމެ ކުއްޖަކު ވެސް އިމްތިހާނުގައި ކާމިޔާބީ ހޯދައި، މި ގައުމު ފަހުރުވެރިވާނެ ހިދުމަތްތެރި ދަރިއަކަށް ވުމަށް ހިތްވަރު ދެއްވާފަ އެވެ.

މުޅިއެކު 260 ސެންޓަރެއްގައި އޯލެވެން އިމްތިހާނު ކުރިއަށް ގެންދާނެ އެވެ. އޭގެ ތެރޭގައި ހިމެނެނީ މާލެ ސަރަހައްދުގެ 23 ސެންޓަރަކާއި، އަތޮޅު ތެރެއިން 237 ސެންޓަރެކެވެ.