މައްސަލަ ހައްލުވެއްޖެ، ގަން އެއާޕޯޓުގެ މަގު ހެދުމުގެ މަސައްކަތް ކުރިއަށްދާނެ

ގަން އިންޓަނޭޝަނަލް އެއާޕޯޓްގެ ބޮޑު މަގު ހެދުމުގެ މައްސަލަ ހައްލު ކުރެވިފައިވާ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެ އެވެ.

މުއްތަލިބު ކުރެއްވި އެކްސް ޕޯސްޓެއްގައި ވިދާޅުވީ ގަން އިންޓަނެޝަނަލް އެއާޕޯޓް ތަރައްގީ ކުރުމުގެ މަޝްރޫއުގެ ތެރެއިން ހެދުމަށް ހަމަޖެހިފައިވާ މަގުގެ މަސައްކަތަށް ހުރަސްއެޅިފައިވާ އިކުއޭޓާ ވިލެޖްގެ ލޭބާ ކުއާޓާ ސަރަހައްދުގެ މައްސަލައާމެދު ކަމާބެހޭ ހުރިހާ ފަރާތަކާއި މަޝްވަރާ ކުރެވި، މައްސަލަ ހައްލު ވެފައިވާކަން އައްޑޫ އިންޓަނޭޝަނަލް އެއާޕޯޓް ކޮމްޕެނީން މިނިސްޓްރީއަށް މިއަދު އަންގާފައިވާ ކަމަށެވެ.

މިނިސްޓަރު ވިދާޅުވީ އެހެން ކަމުން، އެ މަގު ހެދުމުގެ މަސައްކަތް އެއްބަސްވުމާއި އެއްގޮތަށް، ގަން އެއާޕޯޓް ތަރައްގީ ކުރުމުގެ މަޝްރޫއުގެ ތެރެއިން ކުރިއަށް ގެންދެވޭނެ ކަމަށެވެ.

“އެހެންކަމުން، މި މަގު ހެދުމުގެ މަސައްކަތް އެއްބަސްވުމާ އެއްގޮތަށް، ކުރިއަށް ގެންދެވޭނެ ވާހަކަ ދަންނަވަން،" މުއްތަލިބު ވިދާޅުވި އެވެ.

މި މައްސަލަ ހަލުކުރުމަށް ޓަކައި އައްޑޫ އެއާޕޯޓު ކުންފުނިން ޓޫރިޒަމް މިނިސްޓްރީން ކަމާގުޅޭ އެހެން ފަރާތްތަކާ ގުޅިގެން މަސައްކަތް ފާހަގަކޮށްފައިވާ ކަން ފާހަގަ ކުރައްވާ މިނިސްޓަރު ވަނީ އެ ފަރާތް ތަކަށް ޝުކުރު ދަންނަވާފަ އެވެ.

ގަން އިންޓަނޭޝަނަލް އެއާޕޯޓު ބޮޑު ކުރުމަށް ހިންގާ މަޝްރޫއާ އެކު، މައި މަގު ހެދުމަށް ބޭނުންވާ ސަރަހައްދުގެ ތެރެއަށް އިކުއޭޓާ ވިލޭޖަށް ދޫކޮށްފައިވާ ބިމެއް ވަންނާތީ، އެ ބިން ހުސް ނުކުރުމުގެ ސަބަބުން ކައިމޫ ޓްރެވެލްސް އެން ހޮޓެލްސް ސާވިސް އާ އޭއައިއޭއާ ދެމެދު ވަނީ ހިޔާލު ތަފާތުވުން އުފެދިފަ އެވެ.