ދުންފަތުގެ ވިޔަފާރިކުރުމަށް 3 މަސް ތެރޭ ލައިސަންސް ނަގަން އަންގައިފި

ދުންފަތުގެ ވިޔަފާރި ކުރަމުން އަންނަ ފަރާތް ތަކުން މިއަދުން ފަށައިގެން ކުރިއަށް އޮތް ތިން މަސް ތެރޭގައި ލައިސަންސް ނެގުމަށް ހެލްތް މިނިސްޓްރީ އިން އަންގައިފި އެވެ.

ހެލްތް މިނިސްޓްރީން މިއަދު ކުރި އިއުލާނުގައި ވަނީ ރާއްޖެއަށް އަލަށް އެތެރެ ކުރާ ދުންފަތުގެ ބާވަތްތައް ރެޖިސްޓްރީ ކުރުމަށް ބޭނުންވާ ފަރާތް ތަކުން އެޕްލިކޭޝަން ހުށަހެޅުމުގެ ފުރުސަތު މިއަދުން ފަށައިގެން ހުޅުވާލާފަ އެވެ.

ދުންފަތުގެ ވިޔަފާރި ކުރާ ފަރާތް ތަކަށް ދޫކުރާ ހަތަރު ލައިސެންސުގެ ތެރޭގައި:

1. ދުންފަތުގެ ބާވަތްތައް ވަކިން ނުވަތަ ގަނޑުކޮށް ވިއްކުމުގެ ލައިސަންސް

2. ދުންފަތުގެ ބާވަތްތައް އިމްޕޯރޓުކުރުމުގެ ލައިސަންސް

3. ދުންފަތުގެ ބާވަތްތައް ރިއެކްސްޕޯރޓުކުރުމުގެ ލައިސަންސް

4. ދުންފަތުގެ އައު ބާވަތެއް ރެޖިސްޓްރީ ކުރުން

ހެލްތް މިނިސްޓްރީން ބުނިގޮތުގައި ލައިސަންސްތައް ދޫކުރެވޭނީ ކަނޑައެޅިފައިވާ ފީ ދެއްކުމުން ފަސް އަހަރު ދުވަހުގެ މުއްދަތަށެވެ. އަދި ލައިސަންސް އައު ކުރަން އެދޭ ފަރާތް ތަކުން މުއްދަތު ހަމަވުމުގެ 60 ދުވަހުގެ ކުރިން އެ ކަމަށް އެދި ހުށަހަޅަންޖެހެ އެވެ.

ދުންފަތް ކޮންޓްރޯލް ކުރުމާބެހޭ އާންމު ގަވާއިދުގެ ދަށުން ދޫކުރާ ލައިސަންސު ތަކަށް ދައްކަންޖެހޭ ފީ އަކީ:

1. ދުންފަތުގެ ބާވަތްތައް ރާއްޖޭގައި ގަނޑުކޮށް ނުވަތަ ވަކި ވަކީން ވިއްކުމަށް ދޫ ކުރާ ލައިސަންސް ހޯދުމަށް ނުވަތަ އައު ކުރުމަށް - 5،000 ރުފިޔާ

2. ދުންފަތުގެ ބާވަތްތައް ރާއްޖެއަށް އިމްޕޯޓު ކުރާ ފަރާތް ތަކަށް ދޭ ލައިސަންސް ހޯދުމަށް ނުވަތަ އައު ކުރުމަށް - 10،000 ރުފިޔާ

3. ދުންފަތުގެ ބާވަތްތައް ރީއެކްސްޕޯޓު ކުރާ ފަރާތް ތަކަށް ދޭ ލައިސަންސް ހޯދުމަށް ނުވަތަ އައު ކުރުމަށް - 10،000

4. ސްމޯކިން ރޫމް ނުވަތަ ސްމޯކިން އޭރިއާގެ ލައިސަންސް ހޯދުމަށް ނުވަތަ އައު ކުރުމަށް - 10،000

މި ހިދުމަތަށް ހޯދުމަށް އެދި ހުށަހަޅާނީ، ވަންގަވް ޕޯޓަލް މެދުވުވެރިކޮށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އަށެވެ.

ވަންގަވް މެދުވެރިކޮށް އެޕްލިކޭޝަން ހުށަހެޅުމުގައި އެއްވެސް މައްސަލައެއް ދިވާވެއްޖެ ނަމަ ގުޅާނީ ވަންގަވް ހޮޓްލައިން ނަންބަރު 1500 އަށެވެ. އަދި އީމެއިލް ކުރާނީ support@one.gov.mv  އަށެވެ.