ރައީސް މުއިއްޒު ނޫސްވެރީންނާ ބައްދަލު ކުރައްވަނީ

އަންނަ މެއި މަހުގެ ތިން ވަނަ ދުވަހު ނޫސްވެރީންނާ ބައްދަލުކުރައްވަން ނިންމަވާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ހާމަ ކުރައްވައިފި އެވެ.

ނޫސްވެރިކަމުގެ މިނިވަން ކަމުގެ ދުވަހުގެ ގޮތުގައި ބައިނަލްއަގުވާމީ ފެންވަރުގައި ފާހަގަ ކުރާ، މެއި މަހުގެ ތިން ވަނަ ދުވަހު، ނޫސްވެރީންނާ ބައްދަލު ކުރައްވާނެކަން ރައީސުލްޖުމްހޫރިއްޔާ ހާމަ ކުރައްވާފައި ވަނީ "ރައްޔިތުންނާ އެކު" ސިލްސިލާ ޕޮޑްކާސްޓްގެ ހަތަރު ވަނަ އެޕިސޯޑްގައި ވާހަކަފުޅު ދައްކަވަމުންނެވެ.

ރައީސް މުއިއްޒު ވަނީ، މެއި މަހުގެ ތިން ވަނަ ދުވަހު އެ މަނިކުފާނު ކުރިއަށް ގެންދަވާ ނޫސް ކޮންފަރެންސްގައި ކޮންމެ ކަހަލަ ސުވާލެއް ވެސް ކުރިމަތި ކުރެވިދާނެ ކަމަށާއި، މިހާރުން ފަށައިގެން އެ ކަމަށް ތައްޔާރު ވުމަށް، ނޫސްވެރީންނަށް ދައުވަތު ދެއްވާފަ އެވެ.

މީގެ އިތުރުން ޓީވީ ސްޓޭޝަނަކުން ދައުވަތު ދީފި ނަމަ، އެ ސްޓޭޝަނަކުން ކުރިއަށް ގެންދާ ޕްރޮގްރާމެއްގައި ބައިވެރިވެވަޑައިގެން، ސުވާލު ތަކަށް ޖަވާބު ދެއްވުމަށް ވެސް އެ މަނިކުފާނު ހުންނެވީ ތައްޔާރަށް ކަމުގައި ރައީސުލްޖުމްހޫރިއްޔާ ވަނީ ވިދާޅުވެފަ އެވެ.

ހުރިހާވެސް އަމާޒަކީ ނަތީޖާ ނެރެދެއްވުން ކަމަށާއި، އެހެން ކަމުން ގިނަ ވަގުތު ހޭދަ ކުރައްވަނީ މަސައްކަތުގެ ތެރޭގައި ކަމަށް ވެސް ރައީސް ވަނީ ވިދާޅުވެފަ އެވެ.

ނަމަވެސް، ވަގުތު ލިބިވަޑައިގެންނެވި މިންވަރަކުން، މައުލޫމާތު ހިއްސާ ކުރެއްވުމާއި ގުޅުން ހުރި ކަންކަމަށް ވަގުތު ހުސް ކުރައްވާނެ ކަމަށާ، ކުރިއަށް އޮތް ތަނުގައި ސީދާ ނޫސްވެރީންނަށް ވެސް ވަގުތު ދެއްވާނެ ކަމުގައި ރައީސުލްޖުމްހޫރިއްޔާ ވިދާޅުވި އެވެ.