އެމްޓީސީސީގެ ކުރީގެ ސީއީއޯ ޝާހު ހިމެނޭހެން އިތުރު ބަޔަކަށް ދައުވާ ކުރަން ޕީޖީއަށް

އެމްޓީސީސީގެ މުވައްޒަފުންނަށް ހުޅުމާލޭގެ ދެވަހަ ފޭހުގައި ހައުސިން މަޝްރޫއެއްގެ ގޮތުގައި ދެ ޓަވަރު އެޅުމުގެ ޕްރޮޖެކްޓް ކުރިއަށް ގެންދިއުމުގައި ކޮރަޕްޝަންގެ އަމަލުތަކެއް ހިންގާފައިވާ ކަމަށް ތުހުމަތުކޮށް އެ ކުންފީނުގެ ކުރީގެ ސީއީއޯ ހަސަން ޝާހު ހިމެނޭހެން އިތުރު ބައެއްގެ މައްޗަށް ދައުވާ ކޮށްދިނުމަށް އެދި ޕީޖީ އޮފީހަށް ފޮނުވައިފި އެވެ.

އިއްޔެ ފޮނުވި މި މައްސަލާގައި ޝާހުގެ އިތުރުން ދައުވާ ކޮށްދޭން އެދިފައިވާ މީހުންނަކީ:

1. ހ. ފެއަރީ ޕެލަސް، ޝިފާއު އަލީ (ޖެނެރަލް މެނޭޖަރު އަދި ޓެންޑާ އިވެލުއޭޝަން ކޮމިޓީގެ މެންބަރު9

2. ށ. ކޮމަންޑޫ، ޕާކީޒާ، ހުސައިން ޒުހުރީ (ޓެންޑާ އިވެލުއޭޝަން ކޮމިޓީގެ މެންބަރު)

3. މ. ޕޮމްޕިޔާ، މުޙައްމަދު ނާޒިމް (ޓެންޑާ އިވެލުއޭޝަން ކޮމިޓީގެ މެންބަރު)

4. ގ. ނިލަ، އިސްމާޢީލް އަދުހަމް (ޓެންޑާ އިވެލުއޭޝަން ކޮމިޓީގެ މެންބަރު)

އެންޓި ކޮރަޕްޝަން ކޮމިޝަނުން މިއަދު ނެރުނު ބަޔާނެއްގައި ވަނީ، ހުޅުމާލޭ ދެވަނަ ފިޔަވަހީގައި 15 ބުރީގެ ދެ ޓަވަރު އަޅައިދޭނެ ފަރާތެއް ހޯދުމަށް ކުރި އިއުލާނާ ގުޅިގެން ބިޑު ހުށަހަޅާފައިވާ ފަރާތް ތަކުގެ ތެރެއިން ބޭރުގެ ކުންފުންޏަކަށް އިވެލުއޭޝަން ކްރައިޓީރިއާ އާ ހިލާފަށް ޕޮއިންޓު ދީ އެ މަޝްރޫއު އެ ކުންފުންޏާ ހަވާލު ކޮށްފައިވާ ކަމަށެވެ.

އަދި އެއްބަސްވުން ބާތިލް ކުރާން ޖެހޭ ފަދަ ހިލާފު ތަކެއް އެ ކުންފުނިން ވެފައިވީ ނަމަވެސް، އެއްބަސްވުން ބާތިލު ކުރުމުގެ ބަދަލުގައި އެ ކުންފުންޏަށް އެޑްވާންސް ޕޭމަންޓާއި ޕްރޮގްރެސިވް ޕޭމަންޓްތައް ދޫކޮށްފައިވާ ކަމަށް ވެސް އެ ބަޔާނުގައި ބުނެ އެވެ.