މިއަހަރުގެ ކުޑަކުދީންގެ ދުވަސް ކުލަގަދަކޮށް ފާހަގަކުރަނީ

މި އަހަރުގެ ކުޑަކުދީންގެ ދުވަސް މުޅި ރާއްޖޭގައި ކުލަގަދަކޮށް ފާހަގަ ކުރުމަށް އެޑިއުކޭޝަން މިނިސްޓްރީ އިން ނިންމައިފި އެވެ.

މިއަދު ޕްރިންސިޕަލުންނާއެކު ބޭއްވި ބައްދަލުވުމެއްގައި މިނިސްޓަރު ޑރ. އިސްމާޢީލް ޝަފީއު ވަނީ މި ކަމާގުޅޭ ގޮތުން ޕްރިންސިޕަލުންގެ މަޝްވަރާ ހޯއްދަވާފަ އެވެ.

އެ ގޮތުން މާލޭ ސަރަހައްދުގެ ހުރިހާ ސުކޫލު ތަކުގެ ބައިވެރިވުމާއެކު ސުކޫލު ތަކުން ގުޅިގެން ކުލަގަދަ ކުޑަކުދީންގެ ހަވީރެއް ބޭއްވުމާ ގުޅޭގޮތުން ވަނީ މަޝްވަރާ ކުރައްވާފަ އެވެ. އަދި އަތޮޅުތެރޭގެ ހުރިހާ ރަށްރަށުގެ ޕްރިންސިޕަލުންނާއެކު ބޭއްވި އޮންލައިން ބައްދަލުވުމުގައި، އެ ރަށްރަށުގައި ކުރިއަށްގެންދެވިދާނެ ހަރަކާތްތަކާ ގުޅޭ ގޮތުން މިނިސްޓަރު ހިޔާލު ހޯއްދެވި އެވެ.

މީގެ އިތުރުން މިނިސްޓަރު ވަނީ ކުޑަކުދީންގެ ދުވަހާ ގުޅުވައިގެން ސުކޫލް ފެންވަރުގައި ހާއްސަ އެސެމްބްލީ ތަކާއި އިތުރު ހަރަކާތްތައް ބޭއްވި ކަމުގައި ވިޔަސް، ކިޔަވައި ދިނުމުގެ ގަޑިތައް ނުގެއްލޭނެ ގޮތަށް އެ ކަންކަން އިންތިޒާމު ކުރުމަށް ޕްރިންސިޕަލުންނަށް އިލްތިމާސް ކުރައްވާފައެވެ.

އަދި އެ ދުވަހުގެ ހަރަކާތްތައް މެދުވެރިކޮށް، ކުޑަކުދީންނަށް، އެ ކުދިންގެ ހައްގުތައް ކިޔައިދީ، އެ ކުދީންނާ މެދު މައިންބަފައިންނާއި މުޖުތަމައު އަދި ގައުމު ދެކޭ ހުވަފެންތައް ކިޔައި ދިނުމުގެ މުހިންމުކަން މިނިސްޓަރު ޝަފީއު ފާހަގަ ކުރެއްވި އެވެ.

މިއާއެކު އެމަނިކުފާނު ވަނީ ބެލެނިވެރީންނާއި މުދައްރިސުންނަށް ބުރަނުވާނެހެން، ވީހާވެސް ހަރަދުކުޑަކޮށް އެ ދުވަހުގެ ހަރަކާތްތައް ރޭވުމަށް ސުކޫލު ތަކަށް އިރުޝާދު ދެއްވާފަ އެވެ.

އެޑިއުކޭޝަން މިނިސްޓްރީ