ހުޅުމާލޭ ދެ ވަނަ ފޭހުގައި އެއްފަހަރާ 3،000 މީހުންނަށް ނަމާދު ކުރެވޭ ޖާގައިގެ މިސްކިތެއް އަޅަނީ

ހުޅުމާލޭ ދެވަނަ ފޭހުގައި 2،500 މީހުންގެ ޖާގައިގެ މިސްކިތެއް އަޅަން ހަވާލުކުރުން -- ފޮޓޯ/ އިސްލާމިކްސް މިނިސްޓްރީ

ހުޅުމާލޭ ދެވަނަ ފޭހުގައި އައު މިސްކިތެއް އެޅުމަށް އިސްލާމިކް މިނިސްޓްރީން ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އާ ހަވާލުކޮށްފި އެވެ.

މިއަދު އެޗްޑީސީގައި ކުރިއަށްދިޔަ ހާއްސަ ބައްދަލުވުމެއްގައި މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ މިނިސްޓަރު ޑރ. މުޙައްމަދު ޝަހީމް އަލީ ސައީދުއެވެ. އަދި އެޗްޑީސީގެ ފަރާތުން ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު މައުރޫފް ޖަމީލް އެވެ.

މި އެއްބަސްވުމުގެ ދަށުން ހުޅުމާލޭ ދެވަނަ ފޭހުގެ ލޮޓު 22386 ގައި 2500 އާއި 3000 ދެމެދުގެ މީހުންނަށް އެއްފަހަރާ ނަމާދު ކުރެވޭ ވަރުގެ ބޮޑު މިސްކިތެއް އަޅާނެ އެވެ.

މިނިސްޓްރީން ބުނި ގޮތުގައި މި މިސްކިތް އިމާރާތް ކުރުމުގެ މަސައްކަތް ކުރުމަށް ހަމަޖެހިފައި ވަނީ ހެޔޮއެދޭ އަމިއްލަ ފަރާތަކުން ހަރަދު ކޮށްގެންނެވެ. މިސްކިތުގެ މަސައްކަތް ކުރާ ކޮންޓްރެކްޓަރު ހަމަޖައްސާނީ މިސްކިތް އެޅުމަށް ހަރަދު ކުރާ ފަރާތުންނެވެ.

މި މިސް އެޅުމަށް ބިން ހަވާލު ކުރާ ތާރީހުން ފަށައިގެން 24 މަސް ތެރޭގައި މިސްކިތް އިމާރާތްކޮށް ނިންމުމަށް ކަނޑައަޅާފައިވާއިރު، މި މިސްކިތް ނިމޭއިރު، ސޯލާ އާއި އޭސީ ވެސް ހަރު ކުރާނެ ކަމަށް މިނިސްޓްރީން ބުނެ އެވެ.

މި މިސްކިތް ޑިޒައިން ކޮށްފައި ވަނީ ކޮންމެ މިސްކިތެއްގައި ވެސް ގުރުއާން ކިޔަވައިދެވޭ ގޮތަށް ކްލާސް ރޫމާއި ލައިބްރަރީ ހިމެނޭ ގޮތަށެވެ.

މީގެ އިތުރުން މިހާރު ހުޅުމާލޭގައި އަޅަމުން އަންނަ ދާއިމީ މިސްކިތަކުގެ ތެރެއިން ބައެއް މިސްކިތް މި އަހަރުގެ ތެރޭގައި ނިމޭނެކަން ވެސް އިސްލާމިކް މިނިސްޓްރީން ފާހަގަކުރި އެވެ.

އިސްލާމިކް މިނިސްޓްރީ