ކުއްޖަކަށް ޖިންސީ ގުނަވަން ދެއްކި މައްސަލައެއް، އެއްބާރުލުން ނުލިބުމުން ތަހުގީގު މަޑުޖެހިފައި

ކުޑަކުއްޖަކަށް ޖިންސީ ގުނަވަން ދެއްކި މައްސަލައެއްގައި އެ މައްސަލަ ހުށަހެޅި ފަރާތުގެ އެއްބާރުލުން ނުލިބޭތީ، މައްސަލަ މިހާތަނަށް ވެސް ނިމިފައިނުވާ ކަމަށް ފުލުހުން މިއަދު ބުނެފި އެވެ.

ފުލުހުން މީޑިއާ ތަކަށް ފޮނުވި މެސެޖުގައި ބުނި މ، ފ، ދ، ތ، ލ އަތޮޅުގައި ހިމެނޭ ރަށެއްގައި އުމުރުން 14 އަހަރުގެ ކުއްޖަކަށް ފޯނުން ބަރަހަނާ ފޮޓޯ އާއި ވީޑިއޯ، އަދި ޖިންސީ ގުނަވަން ދެއްކި ކަމަށް ތުހުމަތު ކުރެވޭ މަސައްލައެއް، 2022 ޖެނުއަރީ 22 ވަނަ ދުވަހު ފުލުހަށް ހުށަހަޅާފައިވާ ކަމަށެވެ.

މި މައްސަލައިގެ ތަހުގީގުގައި މައްސަލައިގައި ތުހުމަތު ކުރެވޭ މީހާގެ ފޯނާއި ލެޕްޓޮޕް، ފުލުހުންގެ ބެލުމުގެ ދަށަށް ގެނެސް، ފޮރެންސިކް ތަހުލީލުތައްކޮށް، އަދި ހަ މީހެއްގެ ބަޔާނާއި ހެކިބަހުގެ އިތުރުން ދެ މީހެއްގެ ބަޔާން ނަގާފައިވާ ކަމަށް ފުލުހުން ބުންޏެވެ.

ފުލުހުން ބުނީ ފޮރިންސިކް ތަހުލީލުންނާއި ބަޔާން ތަކުން ކުއްޖާ ބުނާ ބުނުން ފިޔަވައި، މައްސަލައާ ގުޅުން ހުރި އަދި ކުރާ ތުހުމަތަށް ބާރު ލިބޭ އެއްވެސް ހެތްކެއް، ނުވަތަ ގަރީނާއެއް ލިބިފައިނުވާ ކަމަށެވެ.

އޭގެ އިތުރުން ތުހުމަތު ކުރެވޭ މީހާ، ކުއްޖާގެ ފޯނަށް ފޮނުވާފައިވާ ކަމަށް ބުނާ މެސެޖު ތަކާއި މައްސަލައާ ގުޅުން ހުރި އެއްވެސް އެއްޗެއް އެ ކުއްޖާގެ ފޯނުގެ ފޮރިންސިކް ތަހުލީލުތަކުން ފެނިފައެއް ނުވާ ކަމަށް ވެސް ފުލުހުން ބުނެ އެވެ.

އިތުރަށް ފުލުހުން ބުނީ މި މައްސަލަ ތަހުގީގުކޮށް، 2022 އޭޕްރީލް 22 ވަނަ ދުވަހު ޕީޖީގެ މަޝްވަރާއަށް ފޮނުވުމުން ބައެއް އިސްލާހުތައް ގެނައުމަށް އެ އިދާރާއިން އެދިފައިވާ ކަމަށެވެ. މި އިސްލާހުތައް ގެނައުމުގައި މައްސަލަ ހުށަހަޅާ ފަރާތުން އެއްބާރުލުން ލިބިފައި ނުވާތީ، މައްސަލަ މިހާތަނަށް ނިމިފައިނުވާ ކަމަށެވެ.

މި މައްސަލައިގެ ތަހުގީގު ފުރިހަމަ ކުރުމަށް ކުރެވެން ހުރި މަސައްކަތްތައް ފުލުހުން އަންނަނީ ކުރަމުންނެވެ.