"ހާއްސަ ލައިސަންސްގެ ސަބަބުން ކުރީގެ ލައިސަންސް ބާތިލެއް ނުވާނެ"

އުމުރުން 60 އަހަރުން މަތީގެ މީހުންނަށް ދޫކުރާ ހާއްސަލަ ލައިސަންސުގެ ސަބަބުން ކުރީގެ ލައިސަންސު ބާތިލު ނުވާނެ ކަމަށް ޓްރާންސްޕޯޓް މިނިސްޓްރީން ބުނެފި އެވެ.

އެ މިނިސްޓްރީން މިއަދު ނެރުނު ބަޔާނެއްގައި ބުނެފައިވަނީ އިސްލާހުގެ ދަށުން 60 އަހަރު ފުރިފައިވާ ދިވެހި ރައްޔިތުންނަށް ބައެއް އުޅަނދު ދުއްވޭ ގޮތަށް ދޫކުރުމަށް ނިންމާފައިވާ ހުއްދަ އާ ގުޅިގެން މިހާރު ދޫކޮށްފައިވާ އެއްވެސް ލައިސެންސެއް ބާތިލު ނުވާނެ ކަމަށެވެ.

އަދި އެއްވެސް ފަރާތަކަށް ދޫކޮށްފައިވާ ލައިސަންސް ބޭނުން ކުރުމަށާއި އަދި އާންމު އުސޫލުގެ ތެރެއިން ދޫ ކުރާ ލައިސަންސް ނެގުމަށާއި އެ ލައިސަންސް ބޭނުން ކޮށްގެން ދުއްވޭ ހުރިހާ ސަރަހައްދެއްގައި ދުއްވުމަށް 60 އަހަރު ފުރިފައިވާ ފަރާތް ތަކަށް ވެސް ހުރަހެއް ނެތް ކަމަށް ވެސް މިނިސްޓްރީއިން ބުނެ އެވެ.

މިނިސްޓްރީން ބުނީ މި ހުއްދަ ތައާރަފު ކުރުމުގެ މައިގަނޑު މަގުސަދަކީ އާންމު އުސޫލުން އެއްގަމު އުޅަނދު ދުއްވުމުގެ ލައިސަންސް ގަވާއިދުގައި ބަޔާން ކުރާ އިމްތިހާނުތައް ފުރިހަމަ ކުރުމަކާ ނުލައި، އެއްގަމު އުޅަނދު ދުއްވުމަށް ބޭނުންވާ އުމުރުން 60 އަހަރުން މަތީގެ ދިވެހި ރައްޔިތުންނަށް އަތޮޅު ތެރޭގެ ރަށްރަށުގައި މި ހުއްދައިގެ ދަށުން ވަކި ބާވަތެއްގެ އުޅަނދުތައް ދުއްވުމަށް ގަވާއިދުގެ ތެރެއިން ފަސޭހަކޮށްދީ މަގުފަހި ކޮށްދިނުން ކަމަށެވެ.

އެހެންކަމުން އިސް އިސްރަށްވެހީންނަށް ގަވާއިދުގެ ތެރެއިން ފަސޭހަކަމާއެކު، އެއްގަމު ދަތުރުފަތުރުގެ ނިޒާމުގެ ތެރޭގައި ހަރަކާތްތެރި ވެވޭނެ ގޮތަށް ޓްރާންސްޕޯޓު މިނިސްޓްރީން ގެނެސްފައިވާ ފަސޭހަ އަދި ހެޔޮ ބަދަލުގެ މަގުސަދު ގެއްލި މައުލޫމާތު އޮޅޭނެ ފަދައިން އެއްވެސް ފަރާތަކުން ޕޯސްޓު ތަކާއި އާޓިކަލްތައް ދައުރު ނުކުރުމަށް ވެސް އެ މިނިސްޓްރީއިން އިލްތިމާސް ކުރެ އެވެ.