އިޒްރޭލު ޕާސްޕޯޓް މަނާކުރަން ކޮމިޓީން ފާސްކޮށްފި

އިޒްރޭލުން ފަލަސްތީނަށް ދެމުން އަންނަ ހަމަލާތައް ހުއްޓާލަންދެން އިސްރޭލުގެ ޕާސްޕޯޓު މަނާ ކުރާން ރައްޔިތުންގެ މަޖިލީހުގެ ސަލާމަތީ ހިދުމަތް ތަކާ ބެހޭ ކޮމިޓީ (241 ކޮމިޓީ)ން މިއަދު ނިންމައިފި އެވެ.

އިމިގްރޭޝަން ގާނޫނަށް ގަލޮޅު އުތުރު ދާއިރާގެ މެންބަރު މީކާއީލް އަހްމަދު ނަސީމް، މި އިސްލާހު ހުށަހެޅުއްވީ މިދިޔަ އަހަރުގެ މެއި 29 ވަނަ ދުވަހު އެވެ. މި ބިލު، ދިގު މުއްދަތަކަށް ކޮމިޓީ މަރުހަލާގައި ހުއްޓިފައި އޮތުމަށްފަހު، މިއަދު ބޭއްވި ބައްދަލުވުމުގައި ވަނީ އެ ބިލަށް ބަދަލު ތަކެއް ގެނެސް ފާސްކޮށްފަ އެވެ.

ބިލަށް ގެނެސްފައިވާ މައިގަނޑު އިސްލާހަކީ، ކުރިން ބިލުގައި އިޒްރޭލު ޕާސްޕޯޓު ގެންގުޅޭ މީހުންނާއި އިޒްރޭލު ޕާސްޕޯޓު އޮންނަ އެހެން ގައުމެއްގެ މީހުންނަށް ވެސް ރާއްޖެ އައުން މަނާވާ ގޮތަށް އޮތް އޮތުން ބަދަލު ކުރުމެވެ.

މިހާރު ބިލު އިސްލާހުކޮށްފައިވާ ގޮތުން، ހަމައެކަނި އިޒްރޭލު ޕާސްޕޯޓު ހުށަހަޅައިގެން ރާއްޖެ އަންނަން ހުށަހަޅާ މީހުންނަށް އެކަނި ރާއްޖެ އެތެރެވުން މަނާވާނެ އެވެ.

މި ގެނައި ބަދަލާއެކު، އިޒްރޭލު ޕާސްޕޯޓާއި އެކު އެހެން ގައުމު ތަކުގެ ޕާސްޕޯޓު އޮންނަ ނުވަތަ ޑުއަލް ސިޓިޒެންޝިޕް އޮންނަ މީހުންނަށް، އެހެން ގސއުމެއްގެ ޕާސްޕޯޓު ބޭނުން ކޮށްގެން ރާއްޖެ އެތެރެވުމުގެ ފުރުސަތު ލިބޭނެ އެވެ. ޕީއެންސީގެ މެޖޯރިޓީ އޮންނަ 241 ކޮމިޓީން މި ބިލު ފާސްކޮށްފައި ވަނީ އިއްތިފާގުންނެވެ.

އިޒްރޭލުގެ ޕާސްޕޯޓުގައި ރާއްޖެ އެތެރެވުން މަނާކުރަން މި ސަރުކާރުން ވެސް ވަނީ މިދިޔަ ޖޫން މަހު ނިންމާފަ އެވެ. ނަމަވެސް މި ނިންމުމަށް އަމަލު ކުރުން ލަސްވެ، ދިގުލައިގެން ގޮސްފައިވާތީ އިދިކޮޅު އެމްޑީޕީ އާއި އާންމުންގެ ފާޑުކިޔުން ސަރުކާރަށާއި މަޖިލީހަށް ވަރަށް ބޮޑަށް އަމާޒުވި އެވެ.