ސައުދީ ފަންޑުގެ އެހީ ދީގެން އަޅައި 400 ހައުސިން ޔުނިޓު މަޝްރޫއު އިފުތިތާހުކޮށްފި

ސައުދީ ފަންޑު ފޯ ޑިވެލޮޕްމަންޓް (ސައުދީ ފަންޑު) އިން 25 މިލިއަން ޑޮލަރުގެ ލޯނު ދީގެން ހުޅުމާލޭގައި އަޅައި "400 އެފޯޑަބަލް ހައުސިން ސްކީމް ޕްރޮޖެކްޓް" އިފުތިތާހު ކޮށްފި އެވެ.

ހުޅުމާލޭ ދެވަނަ ފިޔަވަހީގައި މިއަދު ކުރިއަށްގެންދިޔަ ހާއްސަ ރަސްމިއްޔާތެއްގައި މި މަޝްރޫއު އިފުތިތާހު ކޮށްދެއްވީ ސައުދީ ފަންޑުގެ ސީއީއޯ ސުލްޠާން ބިން އަބްދުއްރަހުމާން އަލް މަރްޝަދު އާއި ފިނޭންސް މިނިސްޓަރު މޫސާ ޒަމީރެވެ.

މި މަޝްރޫއުގެ ދަށުން ހުޅުމާލޭ ދެވަނަ ފޭހުގައި 400 ސޯޝަލް ހައުސިން ޔުނިޓު އިމާރާތް ކުރާނެ އެވެ.

ފިނޭންސް މިނިސްޓްރީން ބުނީ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ގިނަ ބަޔަކަށް ގެދޮރުވެރި ކަމާއި ބޯހިޔާވަހިކަން ފަހިކޮށްދިނުމަށް މި މަޝްރޫއުގެ ސަބަބުން މަގުފަހިވެގެންދާނެ ކަމަށެވެ.

ސައޫދީ ފަންޑު ފޯ ޑިވެލޮޕްމަންޓަކީ 1974 ވަނަ އަހަރު ސައޫދީ އަރަބިއްޔާގެ ސަރުކާރުން އުފައްދާފައިވާ ފަންޑެކެވެ. މި ފަންޑު އުފައްދާފައި ވަނީ ތަރައްގީވަމުން އަންނަ ގައުމު ތަކުގައި ތަރައްގީގެ މަޝްރޫއު ތަކަށް މާލީ އެހީތެރި ކަމާއި އެއްބާރުލުން ފޯރުކޮށްދިނުމަށްޓަކަ އެވެ.

މި ފަންޑުގެ މަގުސަދަކީ ލުއި ލޯނުތަކާއި ހިލޭ އެހީގެ ޒަރީއާއިން ދެމެހެއްޓެނިވި ތަރައްގީ ކުރި އެރުވުމެވެ. މި ގޮތުން މައިގަނޑު ގޮތެއްގައި އަމާޒު ކުރަނީ އަސާސީ ވަސީލަތް ތަކާއި، ސިއްހަތާއި، ތައުލީމާއި، އަދި ހަކަތައިގެ ދާއިރާ ތަކަށެވެ.

ފިނޭންސް މިނިސްޓްރީ