ޖުޑީޝަލް ސާވިސް ކޮމިޝަން (ޖޭއެސްސީ) ގެ ރައީސްކަމުގެ މަގާމަށް ހުސެއިން ރިޒާ އިންތިހާބުކޮށްފި އެވެ.

އެ ކޮމިޝަންގެ ރައީސްކަމުގެ މަގާމަށް، ރައްޔިތުންގެ މަޖިލީހުގެ މެންބަރުންގެ ތެރެއިން ތަމްސީލް ކުރައްވާ މެންބަރަކަށް މާފުށީ ދާއިރާގެ މެންބަރު ހުސެއިން ރިޒާ އިންތިހާބުކުރީ މިއަދު އޮތް ޖޭއެސްސީގެ ބައްދަލުވުމުގަ އެވެ. ޖޭއެސްސީގެ މެންބަރު ކަމަށް މަޖިލީހުން ރިޒާ ކަނޑައެޅުއްވީ މި މަހުގެ 3 ގަ އެވެ.

ގިނަ ދުވަސްތަކެއް ވަންދެން ޖުޑީޝަރީގައި މަސައްކަތް ކުރައްވާފައިވާ ރިޒާ އަކީ މިސްރުގެ އަލްއަޒްހަރު ޔުނިވާސިޓީން މަތީ ތައުލީމު ހާސިލުކުރައްވާފައިވާ ބޭފުޅެކެވެ. އޭނަ ކުރިން ކްރިމިނަލް ކޯޓުގައި ވެސް ކުރިން މަސައްކަތްކުރެއްވި އެވެ.

ޖޭއެސްސީގައި މަޖިލީހުގެ ރައީސް އަބްދުއްރަހީމް އަބްދުﷲ (އަދުރޭ) ވެސް އިންނަވަ އެވެ.

މަޖިލީހުން ކަނޑައަޅާ އާންމު މީހަކާއި އެޓާނީ ޖެނެރަލާއި ރައީސް ކަނޑައަޅުއްވާ މެންބަރަކާއި ސުޕްރީމް ކޯޓާއި ހައިކޯޓުން ކަނޑައަޅާ މެންބަރެއް ވެސް ޖޭއެސްސީގައި ތިއްބަވާނެ އެވެ.

ޖޭއެސްސީގެ ރައީސްކަމަށް ރިޒާ އިންތިހާބު ކުރިއިރު، އެ ކޮމިޝަންގެ ނައިބު ރައީސަކީ ހައިކޯޓުގެ ފަނޑިޔާރު މުހައްމަދު ނިޔާޒެވެ.