އައިޔޫއެމް ސަނާބިލް އިމާރާތުގެ ބިންގާ ރައީސް އަޅުއްވައިދެއްވައިފި

ދިވެހިރާއްޖޭގެ އިސްލާމީ ޔުނިވާސިޓީގެ ސަނާބިލް އިމާރާތް ކުރަން ފެށުމުގެ ރަސްމިއްޔާތު، ރައީސް ޑރ. މުޙައްމަދު މުއިއްޒު ޝަރަފުވެރި ކޮށްދެއްވައިފި އެވެ.

މިއަދު ހަވީރު ކުރިއަށްދިޔަ މި ރަސްމިއްޔާތުގައި ރައީސް ވަނީ ސަނާބިލް އިމާރާތް ކުރަން ފައްޓަވައިދެއްވުމުގެ ގޮތުން ކޮންކްރީޓް އަޅުއްވައިދެއްވާފަ އެވެ.

ސަނާބިލް މަޝްރޫ އަކީ އައިޔޫއެމް އަށް ދެމެހެއްޓިނިވި ގޮތެއްގައި އާމްދަނީ ހޯދުމުގެ ގޮތުން ހިންގޭ މަޝްރޫއެކެވެ. މި މަޝްރޫއުގެ ދަށުން ޔުނިވަސިޓީގެ ބިމެއްގައި ހަތް ބުރީގެ "މިކްސްޑް ޔޫޒް ކޮމްޕްލެކްސް" އެއް ބިނާ ކުރުމަށް ވަނީ ހަމަޖެހިފަ އެވެ.

މިގޮތުން މި އިމާރާތުގައި އޮފީސް ސްޕޭސް ތަކާއި، ފުޑް ކޯޓާއި، މީޓިން ރޫމު ތަކާއި، އޮޑިޓޯރިއަމް އަދި ކޮމާޝަން ޕާކިން ޖާގަތައް ހިމެނެ އެވެ.

މި މަޝްރޫއަކީ އިސްލާމިކް ފައިނޭންސްގެ ސުކޫކް މޮޑެލްގެ ދަށުން ފައިސާ ހޯދައިގެން އިމާރާތެއް އެޅުމަށް ރާއްޖޭގައި ހިންގޭ އެންމެ ފުރަތަމަ މަޝްރޫއެވެ. މި މަޝްރޫއު ހިންގުމަށް ރާއްޖޭގެ ކެޕިޓަލް މާކެޓްގައި އެއް މަސް ދުވަހުގެ މުއްދަތަށް އައިޔޫއެމްގެ ސުކޫކު (ސުކޫކު އިސްތިސްނާއު) ސަބްކްރިޕްޝަން އަށް ހުޅުވާލީ 11 އޮގަސްޓް 2024 ގައެވެ.

އަދި މުއްދަތު ހަމަވިއިރު ,ސަބްސްކްރައިބް ކޮށްފައި ވަނީ ބޭންކް އޮފް މޯލްޑިވްސްގެ ބީއެމްއެލް އިސްލާމިކް އިންނެވެ.

މި އިމާރާތް ނިންމުމަށް ކަނޑައަޅާފައި ވަނީ 18 މަސް ދުވަހުންނެވެ.

މުވައްސަސާތައް ހިންގުން ހަރުދަނާ ކުރެއްވުމަށާއި، ބާރުވެރި ކުރުވުމަށް ސަރުކާރުން އަންނަނީ އެ މުވައްސަސާ އަކަށް ބޭނުންވާ އެންމެ ފުރިހަމަ އެއްބާރުލުން ދެމުން ކަން ފާހަގަ ކޮށްލެވެ އެވެ.