ބޮޑުތަކުރުފާނު މަގުގެ އުތުރުކޮޅު ތަރައްގީ ކުރުމުގެ މަސައްކަތް އެމްޓީސީސީއަށް

މާލެ ސިޓީ ބޮޑުތަކުރުފާނު މަގުގެ އުތުރުކޮޅު ހެންވޭރު ފެރީ ޓާމިނަލުން ފަށައިގެން މަސްމާރުކޭޓު ސަރަހައްދާއި ހަމައަށް ތަރައްގީ ކުރުމުގެ މަސައްކަތް ސަރުކާރުން އެމްޓީސީސީ އާ ހަވާލުކޮށްފި އެވެ.

މި މަޝްރޫއު ހަވާލުކުރުމަށް މިއަދު ބޭއްވި ރަސްމިއްޔާތުގައި، އެމްޓީސީސީގެ ފަރާތުން ސޮއި ކުރެއްވީ މެނޭޖިން ޑިރެކްޓަރު، ޑީސީޕީ (ރިޓަޔާޑް) އަހުމަދު ސައުދީއެވެ. އަދި މިނިސްޓްރީ އޮފް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާގެ ފަރާތުން ސޮއި ކުރެއްވީ މިނިސްޓަރު ޑރ. އަބްދުﷲ މުއްތަލިބެވެ.

އެމްޓީސީސީން ބުނީ ބޮޑުތަކުރުފާނު މަގުގެ އުތުރުކޮޅަކީ މާލޭގެ އެންމެ ގިނަ މީހުން ބޭނުން ކުރާ އެންމެ ބާރުބޮޑު އެއް ސަރަހައްދު ކަމަށާއި އެ މަގު ފުޅާކޮށް ތާރުއަޅާ ނިމުމުން، އެ ސަރަހައްދުގައި ފަސޭހަކަމާއެކު ދެކޮޅަށް ދަތުރު ކުރުމަށް މަގުފަހިވެގެން ދާނެ ކަމަށެވެ.

އަދި އުޅަނދު ފަހަރު ޕާކް ކުރާނެ ޖާގަ އިތުރުވުމާއި އެ މަގުގެ އުތުރުކޮޅުގެ މަސައްކަތް ނިމިގެންދާއިރު، ފެންހިންދާ ނިޒާމެއް ވެސް ގާއިމުވެގެންދިއުމާއެކު، ވިއްސާރަ ވުމުން ފެންބޮޑުވާ މައްސަލައަށް ވެސް ބޮޑު ހައްލެއް ލިބިގެން ދާނެ ކަމަށް އެ ކުންފުނިން ބުންޏެވެ.

މި މަޝްރޫއުގެ ދަށުން، 830 މީޓަރުގެ މަގެއް ހެދިގެންދާއިރު، 737 މީޓަރުގެ ސަރަހައްދެއްގައި ޝީޓް ޕައިލް މަސައްކަތް ކުރެވިގެންދާނެ އެވެ. އަދި، ތާރު އަޅާ ސަބްބޭސް ތައްޔާރު ކުރުމާއި، ހިނގާ މީހުންނަށް ވަކި ލޭނެއް ގާއިމު ކުރުމާއި، ފެންހިންދާ ނިޒާމެއް ވެސް ގާއިމު ކުރެވިގެންދާނެ އެވެ.  

މީގެ އިތުރުން، ޑްރޭއިނޭޖް ސާވިސް ލައިން އެޅުމާއި، މަގު ބައްތި ހަރުކުރުމާއި މަގުމަތީ ނިޝާން ހަރުކުރުމުގެ މަސައްކަތް ވެސް މި މަޝްރޫއުގައި ހިމެނެ އެވެ.

މިއީ 144.50 މިލިއަން ރުފިޔާއަށް 455 ދުވަސް ތެރޭ ނިންމުމަށް އެމްޓީސީސީ އާ ހަވާލުކޮށްފައިވާ މަޝްރޫ އެކެވެ.