ކަރެކްޝަންގެ މުވައްޒަފުން، ގައިދީންގެ އާއިލާ ތަކަށް ފައިސާގެ އެހީ ދީފި

މޯލްޑިވްސް ކަރެކްޝަނަލް ސާވިސް (އެމްސީއެސް) ގެ އޮފިސަރުންނާއި މުވައްޒަފުންގެ ފަރާތުން ގައިދީންނާއި ބަންދު މީހުންގެ އާއިލާ ތަކުގެ ތެރެއިން މާލީ ގޮތުން ދަތި ހާލުގައި ދިރިއުޅެމުން އަންނަ އާއިލާ ތަކަކަށް ފައިސާގެ އެހީ ދީފި އެވެ.

އެމްސީއެސް އިން ބުނީ މި އަހަރުގެ ރޯދަ މަހާ ގުޅުވައިގެން އެމްސީއެސްގެ އޮފިސަރުންނާއި މުވައްޒަފުންގެ ފަރާތުން ފައިސާ އެއްކޮށް، އެ ސާވިސްގެ ބެލުމުގެ ދަށުގައި ތިބި ގައިދީންނާއި ބަންދު މީހުންގެ އާއިލާ ތަކުގެ ތެރެއިން މާލީ ގޮތުން ދަތި ހާލުގައި ދިރިއުޅޭ 10 އާއިލާ އަކަށް އެހީތެރިކަން ފޯރުކޮށްދީފައިވާ ކަމަށެވެ.

އެ ގޮތުން އޭގެން ކޮންމެ އާއިލާ އަކަށް 2،220ރ. ގެ މަގުން އެހީ ދީފައިވާ ކަމަށް އެ އިދާރާއިން ބުންޏެވެ.

ކަރެކްޝަނުން ބުނީ ރަމަޟާން މަހުގެ ހާއްސަ އެހީ ފޯރުކޮށްދޭ ޕްރޮގްރާމްގެ މައިގަނޑު މަގުސަދަކީ ޖަލުގައި ތިބޭ ގައިދީންނާއި ބަންދު މީހުންގެ އާއިލާ ތަކުގެ ތެރެއިން މާލީ ގޮތުން ފުދުންތެރިކަން ދަތި އާއިލާ ތަކަށް ކަރެކްޝަނަލް ސާވިސްގެ މުވައްޒަފުންގެ ފަރާތުން ވެދެވެންހުރި މާލީ އެހީތެރިކަން ފޯރުކޮށްދިނުން ކަމަށެވެ.

ރަމަޟާން މަހުގެ ހާއްސަ އެހީ ފޯރުކޮށްދޭ ޕްރޮގްރާމްގެ ދަށުން 40 އާއިލާ އަކަށް އެހީތެރިކަން ފޯރުކޮށްދިނުމަށް ނިންމާފައިވީ ނަމަވެސް އެ ޕްރޮގްރާމަށް އެދި ފޯމް ހުށަހަޅާފައި ވަނީ ޖުމުލަ 21 ފަރާތުން ކަމަށް އެމްސީއެސް އިން ބުނެ އެވެ.

އޭގެ ތެރެއިން ކަނޑައެޅިފައިވާ ޝަރުތުތައް ހަމަވެފައި ވަނީ ޖުމުލަ 10 އާއިލާ އެވެ.

މިކަމަށް ކަނޑައަޅާފައިވާ ޝަރުތު ތަކުގެ ތެރޭގައި ޖަލުގައި ހުކުމް ތަންފީޒު ކުރަމުން ގެންދާތާ މަދުވެގެން ފަސް އަހަރު ހޭދަ ކޮށްފައި ވުމާއި 18 އަހަރު ނުފުރޭ ކުދިން ތިބުމާއި އާމްދަނީ ލިބޭ މިންވަރު ހިމެނެ އެވެ.