އައްޑޫ ލިންކް ރޯޑް ތަރައްގީ ކުރަން އާރުޑީސީއާ ހަވާލުކޮށްފި

އައްޑޫ ލިންކު ރޯޑް ތަރައްގީ ކުރަން އާރުޑީސީއާ ހަވާލުކުރުން --

އައްޑޫ ސިޓީގެ ލިންކް ރޯޑް، މަގު ތަކާއި ފެން ހިންދާ ނިޒާމު ޒަމާނީ ފެންވަރަށް ތަރައްގީ ކުރުމަށް ކޮންސްޓްރަކްޝަން މިނިސްޓްރީ އިން ރޯޑް ޑިވެލޮޕްމަންޓް ކޯޕްރޭޝަން (އާރުޑީސީ) އާ މިއަދު ހަވާލު ކޮށްފި އެވެ.

މި މަސައްކަތުގެ އެއްބަސްވުމުގައި ކޮންސްޓްރަކްޝަން މިނިސްޓްރީގެ ފަރާތުން ސޮއި ކުރެއްވީ މިނިސްޓަރު ޑރ. އަބްދުﷲ މުއްތަލިބެވެ. އަދި އާރުޑީސީގެ ފަރާތުން ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު ބްރިގޭޑިއާ ޖެނެރަލް (ރިޓަޔާޑް) އަލީ ޒުހައިރެވެ.

ކޮންސްޓްރަކްޝަން މިނިސްޓްރީ އިން ބުނީ މި މަޝްރޫއުގެ ދަށުން އައްޑޫ ލިންކް ރޯޑާއި އެހެނިހެން މަގުތައް ތަރައްގީ ކުރުމުގެ އިތުރުން، ފެން ހިންދާ ނިޒާމު ވެސް ޒަމާނީ ފެންވަރަށް ތަރައްގީ ކުރާނެ ކަމަށެވެ.

މިނިސްޓަރު މުއްތަލިބު ވިދާޅުވީ ލިންކް ރޯޑުގެ މަސައްކަތުގެ ދަށުން ޖުމުލަ 12.3 ކިލޯ މީޓަރުގެ ސަރަހައްދެއް ހަދާނެ ކަމަށާއި މީގެ ތެރޭގައި 67.58 ކިލޯ މީޓަރުގެ ސީޓީބީ އަޅާފައިވާ މަގު ތަކުގައި ތާރު އެޅުމުގެ މަސައްކަތް ވެސް ހިމެނޭ ކަމަށެވެ.

މި މަސައްކަތް އާރުޑީސީއާ ހަވާލު ކޮށްފައި ވަނީ 3 އަހަރާއި 11 މަސް ދުވަހުން މަސައްކަތް ނިންމާ ގޮތަށެވެ. މަޝްރޫއުގެ ޖުމުލަ އަގަކީ 829 މިލިޔަން ރުފިޔާ އެވެ.

މިއަދުގެ ރަސްމިއްޔާތުގައި ފޭދޫ ދެކުނު ދާއިރާގެ މެންބަރު އިބްރާހީމްދީދީ، ފޭދޫ އުތުރު ދާއިރާގެ މެންބަރު އިސްމާއީލް ނިޒާރު އަދި ހިތަދޫ އުތުރު ދާއިރާގެ މެންބަރު މުޙައްމަދު ސިނާން ބައިވެރިވެވަޑައިގެންނެވި އެވެ.

ކޮންސްޓްރަކްޝަން މިނިސްޓަރީ މިނިސްޓަރު މުއްތަލިބު