ވަކި ޕްރޮޖެކްޓެއްގެ ގޮތުގައި އައްޑޫ އެއާޕޯޓާ ގުޅޭ މަގު ހަދައިދޭނަން: މުއްތަލިބް

ގަން އިންޓަނޭޝަނަލް އެއާޕޯޓް ތަރައްގީ ކުރުމުގެ މަޝްރޫއުގެ ތެރޭގައި ހިމެނޭ މަގެއްގެ މަސައްކަތް އެ މަޝްރޫއިން އުނި ކުރީ ހުސް ކުރަން ޖެހޭ އިމާރާތެއް ހުސް ނުކުރެވުމުން، މަސައްކަތް ލަސްވެ، ކޮންޓްރެކްޓަރަށް ބަދަލުދޭން ޖެހޭ ފަދަ ހާލަތެއް މެދުވެރިވެދާނެތީ ކަމަށާއި ވަކި ޕްރޮޖެކްޓެއްގެ ގޮތުގައި އެ މަސައްކަތް ފަހުން ކުރިއަށް ގެންދާނެ ކަމަށް ހައުސިން އެންޑް އިންފްރާސްޓްރަކްޗާ މިނިސްޓަރު، އަބްދުﷲ މުއްތަލިބު ވިދާޅުވެއްޖެ އެވެ.

މި މައްސަލައިގައި އައްޑޫ ސިޓީ ކައުންސިލުން މިއަދު ވަނީ އައްޑޫގެ ތަރައްގީއަށް ސަރުކާރުން ހުރަސް ނާޅަން ގޮވާލާ ބަޔާނެއް ވެސް ނެރެފަ އެވެ.

މިނިސްޓަރު މުއްތަލިބު ކުރެއްވި އެކްސް ޕޯސްޓެއްގައި ވިދާޅުވީ އެ ގޮތަށް ނިންމީ އެ މަގު ހަދަން ޖެހޭ ސަރަހައްދުގައި ހުރި އިމާރާތެއް ހުސް ނުކުރެވި އެ ބިން ކޮންޓްކްޓަރާއި ހަވާލު ނުކުރެވުމުގެ ސަބަބުން ޕްރޮޖެކްޓް ނިންމަން ޖެހޭ މުއްދަތަށް ނިންމުމަށް ދަތިވެ، އޭގެ ސަބަބުން ކޮންޓްރެކްޓަރަށް ބަދަލުދޭން ޖެހޭ ފަދަ ހާލަތެއް މެދުވެރިވެ ދައުލަތަށް މާލީ ގޮތުން ގެއްލުން ވެދާނެތީ ކަމަށެވެ.

މުއްތަލިބު ވިދާޅުވި ގޮތުގައި މި އިމާރާތަކީ އަދި އިމާރާތް ހުރި ބިމަކީ އައްޑޫ އިންޓަނޭޝަލް އެއާޕޯޓް ކޮންޕެނީގެ މިލްކެކެވެ. އެހެން ނަމަވެސް ދެ އަހަރެއްހާ ދުވަހު މަސައްކަތް ކޮށްގެން ވެސް އެ އިމާރާތް ބޭނުން ކުރަމުންދާ ފަރާތުން ތަން ހުސް ކުރުމަށް ދެކޮޅު ހަދާފައިވާ ކަމަށެވެ.

‏މި ކަމުގައި އައްޑޫ ރައްޔިތުންގެ ކަންބޮޑުވުން ބަލައިގަންނަ ކަން ފާހަގަ ކުރައްމުން މުއްތަލިބު ވިދާޅުވީ އުއްމީދަކީ ހުރިހާ ފަރާތް ތަކެއްގެ އެއްބާރުލުމާއެކު އެ އިމާރާތް ހުސް ކުރެވި، ކޮންޓްރެކްޓަރާ ވީހާ ވެސް އަވަހަކަށް ހަވާލު ކުރެވޭ ގޮތްވުން ކަމަށެވެ.

"މިމަހު 17 ގެ ކުރިން މިކަމަށް ހައްލެއް ލިބިއްޖެ ނަމަ އުނިކުރަން އެންގި މަސައްކަތް ކޮންޓްރެކްޓާ އެއްގޮތަށް ކުރިއަށްދާނެ، އަދި ބިން ހުސްނުކުރެވި މި ޕްރޮޖެކްޓް އިން ކުރިއަށް ގެންދެވޭ ގޮތް ނުވެއްޖެ ނަމަ، ބިން ލިބުނުހާ އަވަހަކަށް ވަކި ޕްރޮޖެކްޓެއްގެ ގޮތުގައި އެ މަސައްކަތް ކުރިއަށް ގެންދެވޭނެ،" މުއްތަލިބު ވިދާޅުވި އެވެ.

ގަން އެއާޕޯޓާއި އަދި އެއާޕޯޓާ ގުޅިފައިވާ މަގުތައް ހަދަން ހަވާލުކޮށްފައި ވަނީ އިންޑިއާގެ ރަނާޓާސް ކުންފުންޏާ އެވެ.