ރާއްޖޭގެ 18 ރަށެއްގެ ސުކޫލްތަކުގެ ނުނިމި ހުރި މަސައްކަތްތަށް ނިންމަން ހަވާލުކޮށްފި

ރާއްޖޭގެ 18 ރަށެއްގެ ސުކޫލް ތަކުގެ ނުނިމިހުރި މަސައްކަތްތަށް ކުރުމަށް ތިން ކުންފުންޏަކާ ހަވާލުކޮށްފި އެވެ.

ޖުމުލަ 114.9 މިލިއަން ރުފިޔާއަށް މި މަޝްރޫއުތައް ހަވާލު ކުރީ އެމްޓީސީސީ، ފެނަކަ ކޯޕަރޭޝަން ލިމިޓެޑް އަދި އާރުޑީސީ އާ އެވެ.

އެޑިއުކޭޝަން މިނިސްޓްރީން ބުނި ގޮތުގައި މި މަޝްރޫއު ތަކަކީ ސަރުކާރުން ދޭން ޖެހޭ ފައިސާ ދައްކައި، އެ މަޝްރޫއުތައް ފެށުމަށް އެކި ތާރީހުތައް ބައެއް ކުންފުނި ތަކަށް ދިނުމަށް ފަހު ވެސް އެ މަސައްކަތްތައް ފަށާފައިނުވާ މަޝްރޫއު ތަކެކެވެ.

މި 18 މަޝްރޫއު ތަކުގެ ތެރެއިން 15 މަޝްރޫއެއް ހަވާލުކޮށްފައި ވަނީ އެމްޓީސީސީ އާއެވެ.

އެމްޓީސީސީ އާ ހަވާލު ކުރީ ހއ. މޮޅަދޫ، ހދ. ނޮޅިވަރަންފަރު، ހދ. ނޭކުރެންދޫ،ށ. ބިލެތްފަހި، ރ. އިންނަމާދޫ، ރ. ދުވާފަރު، ބ. ކުޑަރިކިލު، އއ. މަތިވެރި، ތ. ގާދިއްފުށި، ގދ. ވާދޫ، ހއ. މާރަންދޫ، ކ. ގުޅި، ތ. މަޑިފުށި، ހދ. ނައިވާދޫ، ލ. މާވަށް އަދި އއ. މާޅޮހުގައި ކުރިއަށްދާ މަޝްރޫއުތަކެވެ.

އާރުޑީސީ އާއި ހަވާލު ކޮށްފައި ވަނީ ދެ މަޝްރޫއެވެ. އެއީ އއ. މާޅޮސް އަދި އދ. ފެންފުށި އެވެ. އަދި މ. ވޭވަށު ސުކޫލުގެ ނުނިމި ހުރި މަސައްކަތް ހަވާލު ކޮށްފައި ވަނީ ފެނަކަ ކޯޕަރޭޝަން ލިމިޓެޑާ އެވެ.

މި މަސައްކަތްތަށް ހަވާލުކުރުމަށް އެޑިއުކޭޝަން މިނިސްޓްރީގައި މިއަދު ބޭއްވި ރަސްމިއްޔާތުގައި، އެމްޓީސީސީ ގެ ފަރާތުން ސޮއި ކުރެއްވީ އެކުންފުނީގެ މެނޭޖިން ޑިރެކްޓަރު (ރިޓަޔާޑް) ޑީސީޕީ އަހުމަދު ސައުދީ އެވެ.

އާރުޑީސީ ގެ ފަރާތުން އެ ކުންފުނީގެ މެނޭޖިން ޑިރެކްޓަރު ބްރިގޭޑިއާ ޖެނެރަލް (ރިޓަޔާޑް) އަލީ ޒުހައިރް ސޮއެ ކުރެއްވިއިރު، ފެނަކަ ކޯޕަރޭޝަންގެ ފަރާތުން ކޮންޓްރެކްޓް ގައި ސޮއި ކުރެއްވީ އެކުންފުނީގެ މެނޭޖިން ޑިރެކްޓަރު މޭޖަރ (ރިޓަޔާޑް) މުޙައްމަދު ނަޖާހު އެވެ.