ގުޅީގެ ބިން ހިއްކުމުގެ އަމަލީ މަސައްކަތް ފަށައިފި

ކ. ގުޅީގެ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫއުގެ ތެރެއިން ބިން ހިއްކުމުގެ އަމަލީ މަސައްކަތް ފަށައިފި އެވެ.

އެމްޓީސީސީން ބުނީ ގުޅީގައި ރޭ ބޭއްވި މި ރަސްމިއްޔާތުގައި އެމްޓީސީސީގެ މެނޭޖިން ޑިރެކްޓާ ޑީސީޕީ (ރިޓަޔާޑް) އަހުމަދު ސައުދީ އާއި، ކ.ގުޅި ކައުންސިލްގެ ރައީސް މޫސާ ސަފީލްގެ އިތުރުން، އެމްޓީސީސީ އާއި ގުޅީގެ ކައުންސިލްގެ އިސްވެރިން ބައިވެރިވެ ވަޑައިގެންނެވި ކަމަށެވެ.

ގުޅީ ބިން ހިއްކުމުގެ މަޝްރޫއުގެ މަސައްކަތް އަމަލީ ގޮތުން ފައްޓަވައިދެއްވީ ސައުދީ އެވެ.

އެމްޓީސީސީން ބުނީ 814 މީހުންގެ އާބާދީއެއް އޮންނަ ގުޅިއަކީ ބިމުގެ ޖާގައިގެ ގޮތުން ކުޑަނަމަ ވެސް ވަރަށް ރީތި ހިތްގައިމު ރަށެއް ކަމަށާއި މާލެ އަތޮޅުގެ ގިނަ ރަށްތައް ފަދައިން ގުޅިއަކީ ވެސް ފަތުރުވެރިކަން ކުރި އަރަމުން އަންނަ ރަށެއް ކަމަށެވެ.

އެ ގޮތުން މިހާރު ވެސް ރަށުގައި 15 ވަރަކަށް ގެސްޓް ހައުސް އަންނަނީ އެކި ފަންތީގައި ހިންގަމުން ކަމަށާއި ރަށުގެ ގިނަ ރައްޔިތުންނަށް އޮތް އެންމެ ބޮޑު ދައްޗަކީ ރަށުގެ ބިންކޮޅު ކުޑަވުމުން ރަށުގައި ދިރިއުޅުމަށާއި އަދި ވިޔަފާރި ކުރުމަށް އިތުރު ޖާގަ ނެތުމުގެ މައްސަލަ ކަން އެމްޓީސީސީން ފާހަގަ ކޮށްފައިވެ އެވެ.

އޭގެ އިތުރުން އެމްޓީސީސީން ބުނި ގޮތުގައި މި މަޝްރޫއުގެ ދަށުން ބިން ހިއްކުމުގެ މަސައްކަތް ފެށުމާއެކު، ރައްޔިތުންގެ ހުވަފެން ތަކުގައި ކުލަޖެހިގެންދާ ތަން ކުރިއަށް އޮތް މުސްތަގުބަލުގައި ފެންނާނެ އެވެ. އަދި މުޅި މަޝްރޫއު ނިމުމާއެކު، ރަށުގެ ރައްޔިތުންގެ އޮތް ބޯހިޔާވަހިކަމާއި އިގުތިސާދު ފުޅާ ކުރުމަށް އޮތް ދަތި ކަމަށް ބޮޑުތަނުން ހައްލު ލިބޭނެ އެވެ.

އެމްޓީސީސީން ބުނީ މި މަޝްރޫއުގެ ދަށުން، ބިން ހިއްކުމަށްފަހު 10.15 ހެކްޓަރުގެ ބިމެއް މި ރަށަށް އިތުރު ވާނެ ކަމަށެވެ. އަދި ގޮނޑުދޮށް ހިމާޔަތް ކުރުމުގެ މަސައްކަތުގެ ދަށުން 10,962 މީޓަރުގެ ބޮޑު ހިލައިގެ ރިވެޓްމަންޓަކާއި، 362 މީޓަރުގެ ޖިއޯބޭގް ރިވެޓްމަންޓަކާއި 88 މީޓަރުގެ ގްރޮއިންސް ޖެހުމުގެ މަސައްކަތް ކުރާނެ ކަމަށެވެ.

މިއީ ޖުމުލަ 89.63 މިލިއަން ރުފިޔާގެ މަޝްރޫއެއް ކަމަށް އެމްޓީސީސީން ބުނެ އެވެ.