އިސްރާއީލުން ގާޒާގެ ސުކޫލަކަށް ދިން ހަމަލާ ރާއްޖެއިން ކުށްވެރިކޮށްފި

ގައްޒާގެ ދާރުލް އަރްޤަމް ސުކޫލަށް އިސްރާއީލު ސިފައިން ދިން ބޮމުގެ ހަމަލާ ދިވެހި ސަރުކާރުން އެންމެ ހަރުކަށި އިބާރާތުން ކުށްވެރިކޮށްފި އެވެ.

ފޮރިން މިނިސްޓްރީން ނެރުނު ބަޔާނެއްގައި ބުނީ މި ހަމަލާގައި ކުށެއްނެތް އަންހެނުންނާއި ކުޑަކުދިން މަރުވެ އެތަކެއް ބަޔަކު ޒަހަމު ވެފައިވާ ކަމަށެވެ.

މީގެ އިތުރުން، ސައޫދީ ސެންޓާ ފޯ ކަލްޗާ އެންޑް ހެރިޓޭޖުން ގައްޒާގައި ހިންގާ ބޭސް ފަރުވާއަށް ބޭނުންވާ ސާމާނު ރައްކާ ކުރާ ގުދަނަކަށް އިސްރާއީލުން ދިން ހަމަލާ ވެސް ދިވެހި ސަރުކާރުން ކުށްވެރިކޮށްފައިވެ އެވެ. މި ދަފަ ހަމަލާ ތަކަކީ ބައިނަލްއަގުވާމީ ގާނޫނާއި ބައިނަލްއަގުވާމީ އިންސާނިއްޔަތުކަމާ ބެހޭ ގާނޫނާ މުޅިން ހިލާފު އަމަލު ތަކެއްކަން ބަޔާނުގައި ފާހަގަ ކޮށްފައިވެ އެވެ.

އިސްރާއީލުން ހިންގާ މިފަދަ އަނިޔާވެރި އަމަލުތައް ވަގުތުން ހުއްޓުވައި، މި އަމަލު ތަކަށް އިސްރާއީލު ޖަވާބުދާރީ ކުރުވައި، ގައްޒާގެ ރައްޔިތުންގެ އަސާސީ ބޭނުންތައް ފުށްދުމަށް ބޭނުންވާ އެހީތެރިކަން ފޯރުކޮށްދިނުމަށް ބައިނަލްއަގުވާމީ މުޖުތަމައަށް ރާއްޖެއިން ގޮވާލާ ގޮވާލުން ވަނީ ތަކުރާރު ކޮށްފަ އެވެ.

ރާއްޖެއިން ފަލަސްތީނުގެ ރައްޔިތުންނަށް ކުރާ ތާއީދު ތަކުރާރުކޮށް، މި މައްސަލައަށް ދެމެހެއްޓެނިވި އަދި އަދުލުވެރި ހައްލެއް ހޯދޭނީ 1967 ވަނަ އަހަރުގެ ކުރިން ކަނޑައެޅިފައި އޮތް އިން ތަކުގެ މައްޗަށް ބިނާކޮށް، އިރުމަތީ ގުދުސްއަކީ ފަލަސްތީނުގެ ވެރިކަން ކުރާ ރަށްކަމުގައި ކަނޑައަޅައި، ފަލަސްތީނުގެ މިނިވަން ދައުލަތެއް ގާއިމު ކުރެވިގެން ކަމުގައި ރާއްޖެއިން ދެކޭ ކަމަށް ވެސް ފޮރިން މިނިސްޓްރީގެ ބަޔާނުގައިވެ އެވެ.