ރައީސް، ފުޓުބޯލް ފޯ ޕީސްގެ އިސްވެރިންނާ ބައްދަލު ކުރައްވައިފި

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު، އިނގިރޭސިވިލާތަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، ފުޓްބޯލް ފޯ ޕީސްގެ އިސް އޮފިޝަލުންނާ ބައްދަލު ކުރައްވައިފި އެވެ.

ފުޓްބޯލް ފޯ ޕީސްގެ ފަރާތުން ރައީސުލްޖުމްހޫރިއްޔާއަށް މަރުހަބާ ވިދާޅުވީ އެ ޖަމިއްޔާގެ ކޯފައުންޑާ، ކާޝިފް ސިއްދީގީ އާއި، ބްރެޑްފާޑް ސިޓީ އޮފް ކަލްޗާ 2025ގެ ސީއީއޯ، ޝާހްނާޒް ގުލްޒާރެވެ.

މި ބައްދަލު ކުރެއްވުމުގައި، ޔުނިވާސިޓީ ޕީސް ސެންޓާގައި ފުޓްބޯލް ފޯ ޕީސްއިން ހިންގާ ޕްރޮގްރާމް ތަކުގެ މައުލޫމާތު، ރައީސުލްޖުމްހޫރިއްޔާއަށް ވަނީ އަރުވާފަ އެވެ.

މީގެއިތުރުން އެ މަނިކުފާނު ވަނީ އެ ސެންޓަރުގެ ފުޓުބޯޅަ ދަނޑުތައް ބައްލަވާލައްވައި، އެ ވަގުތު ފަރިތަ ކުރުން ތަކުގައި ބައިވެރިވަމުން ދިޔަ ޒުވާނުންނާ ބައްދަލު ކޮށްލައްވާފަ އެވެ.

2013 ވަނަ އަހަރު އުފެދުނު ފުޓްބޯލް ފޯ ޕީސްއަކީ، ފުޓުބޯޅައިގެ ޒަރިއްޔާއިން އިޖުތިމާއީ މައްސަލަތައް ހައްލު ކުރުމަށް ޒުވާނުން ބާރުވެރި ކުރުވުމަށް އދ. ގެ އޮފީސް ފޯ ސްޕޯރޓްސް ފޯ ޑިވަލޮޕްމަންޓް އެންޑް ޕީސްގެ އެހީތެރި ކަމާއެކު ހިންގާ، ބައިނަލްއަގުވާމީ އެންޖީއޯއެ ކެވެ. ފުޓްބޯލް ފޯ ޕީސް އަކީ ސުލްހަ ކުރިއެރުވުމާއި، ޝާމިލު އިޖުތިމާއީ ވެއްޓަކަށް ތާއީދު ކުރާ، ސްޕޯޓްސް ޑިޕްލޮމެސީ އާއި ދޭސީ ޕްރޮގްރާމް ތަކުގެ ތެރެއިން އެކި ފަންތީގެ މީހުން ގުޅިގެން މަސައްކަތް ކުރުމަށް އެހީތެރިވެދޭ ޖަމިއްޔާއެކެވެ.

އަޅާނުލެވި، އެކަހެރިވެފައިވާ ޒުވާން މުޖުތަމައުތައް ބާރުވެރިކުރުވައި، ޓީމެއްގެ ގޮތުގައި މަސައްކަތް ކުރަން ދަސްކޮށްދިނުމާއި، ކޮންފްލިކްޓް ރިޒޮލިއުޝަން ނުވަތަ ދިމާވާ މައްސަލަ ތަކަށް ސުލްހަވެރި ގޮތެއްގައި ހައްލު ހޯދޭނެ އުކުޅުތައް މި ހަރަކާތުގެ ދަށުން ދަސްކޮށްދެއެވެ. އަދި މި ޕްރޮގްރާމްގެ ދަށުން ކުރިއަށް ގެންދާ ޗެރިޓީ މެޗު ތަކާއި ތަމްރީނު ޕްރޮގްރާމް ތަކުގެ ސަބަބުން ކުޑަކުދިންނާއި ކޯޗުންނާއި ޓީމް މެނޭޖަރުންނަށް ބޭނުންވާ ހުނަރުތައް ލިބި، މީގެފައިދާ ބައިނަލްއަގުވާމި މުޖުތަމައަށް ވެސް ލިއްބައިދެ އެވެ.