އެންމެން ގުޅިގެން ގިނަ ހާފިޒުން އުފައްދަން މަސައްކަތް ކުރުމަށް ރައީސް ގޮވާލައްވައިފި

މި ސަރުކާރުގެ ސިޔާސަތަކީ، އަދި ވިސްނުމާ އަޒުމަކީ މައިންބަފައިންނާ މުދައްރިސުން ގުޅިގެން ކުރާ މަސައްކަތުން ގިނަ ކުދިންތަކެއް ހާފިޒުންނަށް ހެދުން ކަމަށާއި، އެންމެހާ ރައްޔިތުން ގުޅިގެން ގިނަ ހާފިޒުން މި ގައުމުގައި އުފެއްދުމަށް މަސައްކަތް ކުރުމަށް ރައީސް ޑރ. މުޙައްމަދު މުއިއްޒު، ގޮވާލައްވައިފި އެވެ.

އިސްލާމީ މަރުކަޒުގެ ޖަލްސާކުރާ މާލަމުގައި މިރޭ ކުރިއަށްގެންދިޔަ ހާފިޒުން ދަސްވެނިވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ވަނީ ކީރިތި ގުރުއާން އުނގަންނައިދިނުމަށް ބާރު އެޅުމަށް ސަރުކާރުން ކުރަމުން އަންނަ މަސައްކަތް ތަކަށް އަލިއަޅުއްވާލައްވާފަ އެވެ. މިގޮތުން ރައީސް ވަނީ ކީރިތި ގުރްއާނާ ބެހޭ ހާއްސަ ވަގުފު އިމާރާތެއް އެޅުމަށް މަސައްކަތް ކުރައްވާ ކަން ފާހަގަ ކުރައްވާފަ އެވެ.

އެކަމަށް ޓަކައި ކުރަމުންދާ މަސައްކަތް ތަކުގެ ތަފުސީލު ހާމަ ކުރައްވަމުން ރައީސް ވިދާޅުވީ މި ފަހުދިހައެއްގައި ވެސް އެ ކަމަށް މަސައްކަތް ކުރައްވައި، މިހާރު މާލެއިން އެ އިމާރާތް އެޅުމަށް ބިމެއް ކަނޑައަޅުއްވާފައިވާ ކަމަށެވެ. އަދި މި ފަހުދިހައެއްގެ ބަންދަށްފަހު ސަރުކާރު ހުޅުވޭއިރު އެ ކަމާބެހޭ ސިޓީ، އިސްލާމިކް މިނިސްޓްރީއަށް ފޮނުއްވާނެ ކަމުގައި އެ މަނިކުފާނު ވިދާޅުވި އެވެ.

އަދި ކީރިތި ގުރުއާނާ ބެހޭ މި ވަގުފު އިމާރާތް އެޅުމުން ލިބޭނެ ފައިދާ ތަކަށް ވެސް މިރޭގެ ރަސްމިއްޔާތުގައި ރައީސް އަލިއަޅުއްވާލެއްވި އެވެ. މިގޮތުން މި އިމާރާތް އެޅުމުން އެ ކުރެވެނީ ވަރަށް މުހިންމު ހޭދައެއް ކަމުގައި ފާހަގަ ކުރައްވައި، ފިކުރީ އަދި ހުރިހާ މާނައެއްގައި ވެސް މުހިންމު އިންވެސްޓްމަންޓަކަށް މިކަން ވާނެ ކަމުގައި އެ މަނިކުފާނު ފާހަގަ ކުރެއްވި އެވެ.

މީގެއިތުރުން ވެސް މިރޮނގުން ކުރައްވަމުންގެންދަވާ މަސައްކަތްތައް އެ މަނިކުފާނު މި ރަސްމިއްޔާތުގައި ފާހަގަ ކުރެއްވި އެވެ.

މިރޭގެ ރަސްމިއްޔާތުގައި ރައީސް ވަނީ ހާފިޒަކަށް ވުމަށް އެ ފަރާތް ތަކުން ކުރައްވާ ބުރަ މަސައްކަތް ފާހަގަ ކުރައްވައި މަރުހަބާ ދަންނަވާފަ އެވެ.