ނުހެދި އޮންނަތާ 7 އަހަރު ފަހުން މިލަދޫ ދަނޑު މި ސަރުކާރުން ނިންމައިފި

ނުހެދި އޮންނަތާ ހަތް އަހަރު ފަހުން ނ. މިލަދޫގެ ޒުވާނުންނާއި ކައުންސިލުން އެދުނު ގޮތަށް އެ ރަށުގެ ބޮޑު ފުޓްބޯޅަ ދަނޑު ނިންމާފައިވާ ކަމަށް ޔޫތް މިނިސްޓްރީން ބުނެފި އެވެ.

މިލަދޫ ފުޓްބޯޅަ ދަނޑަކީ  2017ވަނަ އަހަރު މަސައްކަތް ފެށި ދަނޑެކެވެ. ނަމަވެސް އެކި ސަބަބުތަކާހުރެ، އެ މަސައްކަތް ނުނިންމި އޮންނަތާ ހަތް އަހަރު ފަހުން، ދަނޑުގެ މަސައްކަތް ފުރިހަމަ ކޮށްފައި ވަނީ މި ސަރުކާރުންނެވެ.

މިއީ ރަށް ރަށުގައި ކުރިއަށް ނުގޮސް ހުއްޓިފައިހުރި މަޝްރޫއުތައް ފުރިހަމަ ކުރުމުގެ ޕްރޮގްރާމްގެ ތެރެއިން ނިންމާފައިވާ ޕްރޮޖެކްޓެކެވެ.

މިނިސްޓްރީން ބުނީ ރއީސް ޑރ. މުޙައްމަދު މުއިއްޒުގެ ސަރުކާރުން މި ދަނޑުގެ މަސައްކަތް އަހަރެއްހާ ދުވަހުގެ ތެރޭގައި ނިންމާފައި ވަނީ އެ ރަށުގެ ކައުންސިލުންނާއި ޒުވާނުން އެދިފައިވާ ގޮތަށް ކަމަށެވެ.

މި ގޮތުން ދަނޑުގެ ސަބް ބޭސް ރަނގަޅުކޮށް ދަނޑުގައި ޓާފު އަޅާފައިވެ އެވެ. މީގެ އިތުރުން ވަށާ ފާރާއި، ފެންސު ވެސް ވަނީ މަރާމާތު ކޮށްފަ އެވެ. އަދި ކުރިން ތިން ފޫޓަށް ރާނާފައިވާ ވަށާ ފާރު މިހާރު ވަނީ ހަ ފޫޓަށް އުސްކޮށްފަ އެވެ. އަދި 9 ފޫޓަށް ހުރި ފެންސް މިހާރު ވަނީ 15 ފޫޓަށް އުސްކޮށްފަ އެވެ.

މިލަދޫ ދަނޑުގެ މަސައްކަތް ޒަމާނީ ފެންވަރަށް ތަރައްގީކޮށްފައިވާއިރު، އެ ދަނޑުގެ ލައިޓް ހަރުކުރުމުގެ މަސައްކަތް ވެސް މި ދައުރުގައި ކުރުމަކީ ސަރުކާރުގެ އަމާޒެއް ކަމަށް ވެސް ޔޫތު މިނިސްޓްރީން ބުންޏެވެ.

ނ. މިލަދޫގެ އިތުރުން ސަރުކާރުން ވަނީ ށ. ފުނަދޫގައި ވެސް ފުޓްބޯޅަ ދަނޑެއް އަޅާފަ އެވެ.