މުނިފޫހިފިލުވުމުގެ ހަރަކާތްތަކާއެކު، ކުޑަ އީދަށް މާލޭގައި ބޮޑު ހަވީރެއް ބާއްވަނީ

މުނިފޫހިފިލުވުމުގެ ތަފާތު ހަރަކާތްތަކާއެކު ފިތުރު އީދު ދުވަހު މާލޭގައި ބޮޑު ހަވީރެއް ބާއްވަން ނިންމައިފި އެވެ.

"އީދު ހަވީރު 1446" ގެ ނަމުގައި މި ހަރަކާތް ކުރިއަށް ގެންދަނީ ދިވެހި ސިފައިންނާއި ފުލުހުންގެ އިތުރުން ސަރުކާރު ހިއްސާވާ ކުންފުނިތައް ގުޅިގެންނެވެ.

އެ ހަރަކާތުގެ ބޭނުމަކީ ފިތުރު އީދުގެ އުފަލުގައި އާއިލާތައް އެކުވެރި މާހައުލެއްގައި ބައްދަލުވެ އީދު ސަލާންކޮށް އަދި ހިތްހަމަ ޖެހޭ މާހައުލެއްގައި ވަގުތު ހޭދަކޮށްލުން ކަމަށް އެމްއެންޑީއެފުން ބުނެ އެވެ.

އެމްއެންޑީއެފުން ބުނި ގޮތުގައި މި ފަހަރުގެ އީދު ހަވީރު ކުރިއަށް ގެންދާނީ ކުޑަކުދިން ގަޔާވާނޭ ވަރަށް ގިނަ ކަންކަން ހިމަނައިގެންނެވެ. އަދި އެކި ފަންނުވެރީންގެ ރީތި ހުށަހެޅުން ތަކުގެ އިތުރުން ކުޅިވަރު ކުޅުމާއި ހާއްސަ އެކި ފަރާތްތަކާ ބައްދަލުވުމުގެ ހަނދާނީ ވަގުތުކޮޅަކާ ވެސް އެކުގަ އެވެ.

އީދު ހަވީރު ކުރިއަށް ދާނީ ފިތުރު އީދު ދުވަހުގެ ހަވީރު 4:00 އިން 6 އަށެވެ.

މި ހަވީރު އޮންނާނީ މާލޭ ސަލްޓަން ޕާކުން ފަށައިގެން އިސްލާމީ މަރުކަޒު މައިދާނާއި ޖުމްހޫރީ މައިދާނާއި ރަސްމީ ބޮޑު ފާލަމުގެ ސަރަހައްދު ހިމެނޭހެން އެ ކަމަށް ތައްޔާރު ކޮށްފައިވާ ބޮޑު ސަރަހައްދެއްގަ އެވެ.

އެމްއެންޑީއެފުން ބުނީ އީދު ހަވީރުގައި ބައިވެރިވުމަށް ޒިޔާރަތް ކުރާ އާއިލާ ތަކުން ޖުމުހޫރީ މައިދާނާ ހަމައަށް، އެ ކަމަށް ޓަކައި ތައްޔާރު ކޮށްފައިވާ ސަރަހައްދަށް ވަނުގެ އިންތިޒާމުތައް ހަމަޖައްސާފައިވާނެ ކަމަށެވެ.