ކޮވިޑްގެ ހާލަތުގައި އޮތް 2020 ވަނަ އަހަރު ބަޖެޓު ޑެފެސިޓް އޮތް ވަރަށް ވުރެ 2023 ވަނަ އަހަރުގެ ބަޖެޓު ޑެފެސިޓް ބޮޑުވާނެ ކަމަށް އޮޑިޓް ރިޕޯޓުގައި ބުނެފިއެވެ.

މިދިޔަ އަހަރުގެ ބަޖެޓު ރިވިއުގައި، އޮޑިޓް އޮފީހުން ފާހަގަކޮށްފައި ވަނީ 2020 ވަނަ އަހަރު ބަޖެޓު ޑެފެސިޓް އޮތް ވަރަށް ވުރެ 2023 ވަނަ އަހަރުގެ ބަޖެޓު ޑެފެސިޓް ބޮޑުވާނެ ލަފާކޮށްފައިވާއިރު އެއީ ކަންބޮޑުވާ ކަމެއް ކަމަށެވެ.

އެ ރިޕޯޓުގައި ބުނެފައިވަނީ ފާއިތުވި އަހަރުތަކުގެ ފިސްކަލް ބެލެންސް އެނަލިސިސް އިން ދައްކާ ގޮތުގައި 2020 ވަނަ އަހަރު ކޮވިޑް-19 ގެ ބަލިމަޑުކަމުގެ ސަބަބުން ކުރި އަސަރުތަކާއެކު މުޅި ބަޖެޓް ޑެފިސިޓް ވަނީ ވަރަށް ބޮޑަށް ގޯސްވެފައެވެ.

އިގްތިސާދު ރަނގަޅުވި ނަމަވެސް ބަޖެޓް ޑެފިސިޓް އަދިވެސް އޮތީ ކޮވިޑްގެ ކުރިން ހުރި މިންވަރަށް ވުރެ ގާތްގަނޑަކަށް ދެ ގުނަ އަށް ވުރެ މައްޗަށް ގޮސްފައި ކަމަށް ވެސް ވަނީ ބުނެފައެވެ. އަދި ފާއިތުވި އަހަރުތަކުގައި ސަރުކާރުތަކުގެ ހަރަދު ބޮޑުވެފައިވާއިރު ލިބުނު އާމްދަނީއަށް ވުރެން ކުރި ޚަރަދުތައް ބޮޑު ކަމަށް ވެސް އެ ރިޕޯޓުގައިވެއެވެ.

ފާއިތުވި އަހަރުތަކުގައި (2020 ވަނަ އަހަރު ފިޔަވައި) ބަޖެޓް ފާސްކޮށްފައިވާ މިންގަނޑުތަކުގެ ތެރޭގައި ޚަރަދުތައް ކޮންޓްރޯލް ކުރުމުގައި ސަރުކާރުން ވަނީ ނާކާމިޔާބީއާ ކުރިމަތިލާންޖެހި، ބަޖެޓް ސަޕްލިމެންޓަށް ބަރޯސާވެފައެވެ. އެ މުއްދަތުގެ ތެރޭގައި، ސަރުކާރުގެ އެންމެ ފަހުން ޝާއިޢުކުރެވުނު މެދުރާސްތާ ފިސްކަލް ސްޓްރެޓެޖީސްގެ ދަށުން ކަނޑައަޅުއްވާފައިވާ ބަޖެޓް ލިމިޓްތަކަށްވުރެ، ޖުމްލަ ބަޖެޓް (ސަޕްލިމެންޓާއެކު ބަޖެޓް) ފަހަނައަޅައި ގޮސްފައިވާކަން ވެސް ވަނީ ފާހަގަކޮށްފައެވެ.

ދައުލަތަށް ލިބޭ އާމްދަނީއަށް ވުރެ އިތުރަށް ހޭދަ ކުރުމަކީ އާއްމު ކަމެކެވެ. އެކަމަކު މިވަރަށް ލިބޭ އެއްޗަކާ ހަރަދު އަޅާ ކިޔާއިރު ފަރަގު މަތިވެފައި ވަނީ މަދު ފަހަރެއްގަ އެވެ. އެހެންނަމަވެސް މިދިޔަ ސަރުކާރުގެ ޚަރަދުތައް އިންތިހާއަށް ބޮޑުވެގެން ދިޔައެވެ.