ހުރިހާ ގޮތަކުންވެސް ޒަރީރަކީ ނަމްބަރު 1، ދާއިރާއަށް އެންމެ ހެޔޮ ގޮތް!

އއ.މަތިވެރި ދާއިރާ މިހާރުވެސް ތަމްޞީލް ކުރައްވަމުން ގެންދަވާ ޙަސަން ޒަރީރަކީ އެ ދާއިރާގެ އެންމެ ބޮޑު ޚިދުމަތްތެރިޔާއެވެ. މިއީ މުޅި ދާއިރާއަށް މިކަން ބަލައިގަންނަ ގޮތެވެ. ރައްޔިތުންގެ މަޖިލީހުގެ ތެރެއިންނާއި، މަޖިލީހުގެ ބޭރުންވެސް ދާއިރާގެ ކަންކަމުގައި ވަކާލާތުކޮށް، މުޅި ރާއްޖެއިންވެސް އެންމެ ތަރައްޤީވެފައިވާ ދާއިރާގެ ގޮތުގައި މަތިވެރި ދާއިރާ އޮތް އޮތުމުގެ އެންމެ ބޮޑު މޭސްތިރިއަކީ މެމްބަރު ޒަރީރެވެ. 

ސަރުކާރު ހިންގާ މައި ޕާޓީ، ޕީއެންސީގެ ޓިކެޓުގައި އެ ދާއިރާއަށް ކެނޑިޑޭޓަކު ވާދަ ކުރިކަމުގައި ވީ ނަމަވެސް މުޅި ސަރުކާރުގެ ފުރިހަމަ ތާޢީދު އޮތީ ޒަރީރަށެވެ. ސަބަބުތަކެއް ނެތިއެއް ނޫނެވެ. މި ސަރުކާރު ދެމެހެއްޓުމަށް ޒަރީރު ކުރައްވަމުން ގެންދަވާ މަސައްކަތްތަކާއި، މާޒީގައި ޒަރީރު ކޮށްފަައިވާ ސިޔާސީ އެކި އެކި މަސައްކަތްތަކުގެ ތެރެއިން އުފައްދާފައިވާ އިތުބާރަކީ މިކަމުގެ ނަތީޖާއެވެ. 

ރައީސް ޑރ މުޙައްމަދު މުޢިއްޒު މިއަދު އެދިލައްވަނީ އެ ދާއިރާގެ ގޮނޑިއަށް ޒަރީރު އިންތިހާބުކޮށްދެއްވުމެވެ. 

ނަވާރަ ވަނަ ރައްޔިތުންގެ މަޖިލީހުގެ މަތިވެރި ދާއިރާގެ މެމްބަރުގެ ގޮތުގައި މިހާރުވެސް ހުންނެވީ މެމްބަރު ޙަސަން ޒަރީރެވެ. ޒަރީރަކީ ދާއިރާގެ ރައްޔިތުންގެ ވިސްނުމާއި ފިކުރާއި އެއްގޮތަށް މަސައްކަތް ކުރެއްވި ބޭފުޅެއްކަމާމެދު ދާއިރާގެ އެއްވެސް މީހެއްގެ ހިތުގައި އެއްވެސް މިންވަރެއްގެ ޝައްކެއް ނުހިނގައެވެ.

ވެރިކަން ކުރާ މައި ޕާޓީ، ޕީއެންސީއާ ޒަރީރު ގުޅިވަޑައިގަތީ މިދިޔަ އަހަރުގެ ޑިސެމްބަރ މަސް ތެރޭގައެވެ. މި ސަރުކާރު ދަމަހެއްޓުމަށް ޒަރީރު ކުރެއްވާ މަސައްކަތް ގިނައެވެ. ރައީސް ޑރ މުޙައްމަދު މުޢިއްޒުގެ ފުރިހަމަ އިތުބާރު ޒަރީރު ހޯއްދަވާފައިވާއިރު، މިއީ މި އިންތިހާބު ކާމިޔާބު ކުރުމަށް އޮތް އެންމެ ބޮޑު ޔަޤީންކަމެވެ.

ދާއިރާގައި ހިމެނޭ ރަށްތަކަށް ތަރައްޤީ ގެނައުމުގައި ޒަރީރު ވަނީ ގިނަ ގުނަ މަސައްކަތްތަކެއް ކުރައްވާފައެވެ. އެ ދާއިރާގައި ހިމެނޭ ރަށްތަކުގެ ތެރެއިން ކުޑަ ރަށެއް ބޮޑުރަށެއް ބެލުމެއް ނެތި ސަރުކާރުގެ ތެރެއިން ކުރެވެން ހުރި ކަންކަން ބަލައި އަސާސީ ހުރިހާ ޚިދުމަތްތަކެއް ވަނީ ފުރިހަމަކޮށްދެއްވާފައެވެ. 

ލާމަރުކަޒީ ނިޒާމުން އިދާރީ ހިންގުމަށް ބަދަލު ގެނެވިފައިވީނަމަވެސް ޒަރީރު ޤަބޫލުކުރައްވާ ގޮތުގައި އެކަން ތަންފީޒުވުމުގައި ދާއިރާތަކުގެ ކުރިމަތީގައި އަދިވެސް ބައެއް ހުރަސްތައް އެބަހުއްޓެވެ. ދާއިރާތައް ތަރައްޤީވެ ކުރިއަށްދިޔުމަށްޓަކައި ޤާނޫނުތައް އިޞްލާޙުކޮށް، އައު ޤާނޫނުތައް އުފަންކޮށްގެން މެނުވީ ދާއިރާގެ ރައްޔިތުން އެދޭފަދަ ތަރައްޤީއެއް ނުގެނެވޭނެކަމަށް ޒަރީރު ވިދާޅުވެއެވެ. އެގޮތުން މަތިވެރި ދާއިރާއަށް ބޭނުންޖެހިފައިހުރި ކަންކަމަށް ވަކާލާތުކޮށް ޤާނޫނުގެ ތެރެއިން ކަންކަން މަގުފަހިކުރެވޭނީ މަޖިލީހުގެ ތެރެއިން ކަމާއި އެކަން މިއަދާ ހަމައަށް އައިއިރު ސާބިތުކަމާއެކު ކުރައްވާފައިވަނީ ޒަރީރެވެ.