ހުޅަނގު އައްސޭރީގައި އިސްރާއީލުގެ އާބާދީތައް އިތުރުކުރަން އަޅާ ފިޔަވަޅުތައް ކުށްވެރިކޮށްފި

ގާޒާ --

ފަލަސްތީނުގެ ރައްޔިތުން ގައްޒާއިން ބޭރު ކުރުމަށާއި ހުޅަނގު އައްސޭރީގައި އިސްރާއީލުގެ އާބާދީތައް އިތުރު ކުރުމަށް އަޅައި ފިޔަވަޅުތައް ދިވެހި ސަރުކާރުން ކުށްވެރި ކޮށްފި އެވެ.

ފޮރިން މިނިސްޓްރީން ރޭ ނެރުނު ބަޔާނުގައި ބުނީ ފަލަސްތީނުގެ ރައްޔިތުން މަޖުބޫރުން ބޭރު ކުރުމާއި ހުޅަނގު އައްސޭރީގައިވާ 13 ގައިރުގާނޫނީ އާބާދީ ހިމެނޭ ސަރަޙައްދު ވަކިކޮށް، އެ އާބާދީ ތަކަށް ގާނޫނީ ހައިސިއްޔަތު ދިނުމަށް ތައްޔާރުވުމުގެ ގޮތުން ރާވާފައިވާ ރޭވުންތައް ދިވެހި ސަރުކާރުން އެންމެ ހަރުކަށި އިބާރާތުން ކުށްވެރި ކުރާ ކަމަށެވެ.

ފަލަސްތީނުގެ ރައްޔިތުން، އެބައިމީހުންގެ ބިމުން ނެރުމަށް ހިންގައި މި ފަދަ އަމަލު ތަކަކީ ބައިނަލްއަގުވާމީ ގާނޫނާއި އދ.ގެ ގަރާރުތައް، ހާއްސަކޮށް އދ.ގެ ސަލާމަތީ މަޖިލީހުގެ ގަރާރު 2334 އާ މުޅިން ހިލާފު އަމަލު ތަކެއް ކަމުގައި ދިވެހި ސަރުކާރުން ގަބޫލު ކުރާ ކަމަށެވެ. އަދި މިފަދަ އަމަލު ތަކަކީ ސުލްހައަށް ކުރެވޭ މަސައްކަތް ތަކަށް ހުރަސް އެޅޭ އަދި ފަލަސްތީނުގެ ރައްޔިތުންގެ ހައްގު ތަކާއި ކަރާމާތަށް ނުރައްކާވާ ފަދަ ކަންތައް ތަކެއް ކަމަށް ވެސް ބަޔާނުގައިވެ އެވެ.

މިނިސްޓްރީން ބުނީ މި ހަމަނުޖެހުމަށް ދެމެހެއްޓެނިވި، ސުލްހަވެރި ހައްލެއް ހޯދޭނީ 1967 ވަނަ އަހަރުގެ ކުރިން ކަނޑައެޅިފައި އޮތް އިން ތަކުގެ މައްޗަށް ބިނާކޮށް، އިރުމަތީ ގުދުސް އަކީ ފަލަސްތީނުގެ ވެރިކަން ކުރާ ރަށް ކަމުގައި ކަނޑަ އަޅައި، ފަލަސްތީނަކީ މިނިވަން، މުސްތަގިއްލު އަދި އަމިއްލަ ސިޔާދަތީ ބާރުހިނގާ ދައުލަތެއްގެ ގޮތުގައި ގާއިމު ކުރެވުމުން ކަމަށެވެ.

ފޮރިން މިނިސްޓްރީ