އޯޓިސްޓިކް ކުދީންނަށް ފުރައްސާކުރި މައްސަލަ ބަލައި ފިޔަވަޅު އަޅަނީ

ޓީވީ ޕްރޮގްރާމެއްގައި އޯޓިސްޓިކް ކުދީންނަށް ނިކަމެތިކަން ލިބޭ މޭރުމަކުން ވާހަކަ ދައްކާ، އެ ފަދަ ކުދީންނަށް ފުރައްސާ ކުރި މައްސަލަ ބަލައި ގާނޫނުން ޖާގަ ދޭ އެންމެ ހަރުކަށި ފިޔަވަޅު އަޅާނެ ކަމަށް މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އިން މިއަދު ބުނެފި އެވެ.

އެ ކޮމިޝަނުން މިހެން ބުނެފައި މިވަނީ ރާއްޖެ ޓީވީން ރޭ ގެނެސްދިން ޕްރޮގްރާމެއްގައި ރައީސް ޑރ. މުޙައްމަދު މުއިއްޒަށް މަލާމާތް ކުރާނަމޭ ހިތާ، އޯޓިސްޓިކް ކުދިންނާއި ޑައުން ސިންޑްރޯމް ހުންނަ ކުދީންނަށް ފުރައްސާރަކޮށް ވާހަކަ ދައްކާފައި ވަނިކޮށެވެ.

އެ ޕްރޮގްރާމްގައި ވާހަކަ ދެއްކީ ކުރީގެ ކާނަލް އަހުމަދު ފަޔާޒް (ޕާޕާ ފަޔާޒް) އާއި ނޮޅިވަރަމް ދާއިރާގެ ކުރީގެ މެންބަރު މުހައްމަދު ނަޝީދު (މޮސްޓާ) އެވެ.

މި ވާހަކަތަކާ ގުޅުވައިގެން ބްރޯޑްކޮމް އިން ނެރުނު ސާކިއުލާއެއްގައި ބުނީ ގާނޫނު އަސާސީގެ 35 ވަނަ މާއްދާގައި ބުނާ "ކުޑަކުދީންނާއި ޅަފުރައިގެ ކުދީންނާއި އުމުރުން ދުވަސްވީ މީހުންނާއި ހާއްސާ އެހީއަށް ބޭނުންވާ މީހުންނަށް ލިބޭ ހާއްސަ ރައްކާތެރިކަން" އަދި ބްރޯޑްކާސްޓު ކުރުމުގެ ގާނޫނުގެ 37 ވަނަ މާއްދާގެ ދަށުން އެކުލަވާލާފައިވާ ކޯޑް އޮފް ޕްރެކްޓިސް އާ ގައިޑްލައިން ތަކާ ހިލާފު ކޮންޓެންޓު ބްރޯޑްކާސްޓް ކުރާ ކަމުގެ މައުލޫމާތު ލިބިފައިވާ ކަމަށެވެ.

ބްރޯޑްކޮށް އިން ބުނީ އެހެންކަމުން އެ ފަދަ ކޮންޓެންޓު ތަހުގީގުކޮށް، އެ ކަން ރަނގަޅު ކުރާން ޖެހޭ ހުރިހާ ކަމެއް ކުރުމުގެ ފުރިހަމަ އިހުތިސާސް ކޮމިޝަނަށް ލިބިފައިވާ ކަމަށެވެ. އޭގެ އިތުރުން ކޮމިޝަންގެ ސަމާލު ކަމަށް އަންނަ އަދި ހުށަހަޅައި މި ފަދަ ކޮންޓެންޓު ބަލައި ގާނޫނުން ޖާގަ ދޭ އެންމެ ހަރުކަށި ފިޔަވަޅު އަޅާނެ ކަމަށް ވެސް އެ ކޮމިޝަނުން ބުންޏެވެ.

ބްރޯޑްކޮށް އިން ވަނީ ގާނޫނު އަސާސީ އާއި ރާއްޖޭގެ އަމަލު ކުރަމުން ދާ އެންމެހައި، ގާނޫނު ތަކަށް އިހުތިރާމުކޮށް، އެއްވެސް ފަރާތެއްގެ އަބުރާއި ކަރާމާތް ނުގެއްލޭ ގޮތަށް ކޮންޓެންޓް އުފެއްދުމަށް ބްރޯޑްކާސްޓަރުންނަށް އިލްތިމާސް ކޮށްފަ އެވެ.