"އުއްމީދަކީ އިމިގްރޭޝަންގެ ހިދުމަތްތައް އިތުރަށް ފުޅާ ކުރުން"

އުއްމީދަކީ ކުރިއަށް އޮތް ތަނުގައި ވެސް އިމިގްރޭޝަންގެ ހިދުމަތްތައް އިތުރަށް ފުޅާވެ، ލުއިފަސޭހަ ހިދުމަތް ތަކެއް ފޯރުކޮށްދިނުން ކަމަށް ކޮންޓްރޯލަ ޖެނެރަލް އޮފް އިމިގްރޭޝަން، ކޮމިޝަނަރު އޮފް ޕޮލިސް (ރިޓަޔާޑް) އަހުމަދު ފަސީހް ވިދާޅުވެއްޖެ އެވެ.

އިމިގްރޭޝަނަށް 75 އަހަރު ފުރުމުގެ މުނާސަބަތުގައި ފަސީހު ހިއްސާ ކުރެއްވި ޕޯސްޓެއްގައި ވިދާޅުވީ މާޗު 24 ވަނަ ދުވަހު މޯލްޑިވްސް އިމިގްރޭޝަނަށް 75 އަހަރު ފުރި އަލިމަސް ޔޫބީލް ފާހަގަ ކުރަމުންދާ އިރު، އިމިގްރޭޝަނަށް ހިދުމަތް ކޮށްދެއްވި އަދި މިހާރު ވެސް ހީވާގި ކަމާ އެކު ހިދުމަތް ކޮށްދެއްވަމުން އަންނަ އެންމެހައި މުވައްޒަފުންނަށް ޝުކުރާއި ތަހުނިޔާ ދަންނަވާ ކަމަށެވެ.

ފަސީހު ވިދާޅުވީ އިމިގްރޭޝަންގެ 75 އަހަރުގެ ދިގު ތާރީހުގައި، ގައުމުގެ ދޮރާށިތައް ރައްކާތެރިކޮށް ބެލެހެއްޓުމުގައްޔާއި، ރާއްޖެއިން ބޭރަށް ދަތުރު ކުރާ ދިވެހީންނާއި ރާއްޖޭގައި މަސައްކަތް ކުރާ އުޅޭ ބިދޭސީންނަށް ބޭނުންވާ ގިނަ ހިދުމަތް ތަކެއް ޒަމާނުއްސުރެ، ފޯރުކޮށް ދެމުން އަންނަކަން އުފަލާއެކު ފާހަގަ ކުރައްވާ ކަމަށެވެ.

އަދި ކުރިއަށް އޮތް ތަނުގައި ވެސް އިމިގްރޭޝަންގެ ހިދުމަތްތައް އިތުރަށް ފުޅާވެ، ލުއި ފަސޭހަ ހިދުމަތް ތަކެއް ފޯރުކޮށް ދެވި، ރާއްޖޭގެ ސަލާމަތާއި ރައްކާތެރިކަން ދެމެހެއްޓުމަށް ކުރަމުންދާ މަސައްކަތުގައި އިތުރު ކުރިއެރުންތައް ލިބިގެން ދިޔުމަށް އުއްމީދު ކުރައްވާ ކަމަށް ފަސީހު ވިދާޅުވި އެވެ.

އޭގެ އިތުރުން ރާއްޖޭގެ ސަލާމަތާއި ރައްކާތެރިކަން ދެމެހެއްޓުމަށް ކުރާ މަސައްކަތުގައި ވެސް އިތުރު ކުރިއެރުންތައް ލިބިގެންދާނެ ކަމަށް އުއްމީދު ކުރައްވާ ކަމަށް ފަސީހު ވިދާޅުވި އެވެ.