ވިލިތަރި ގުރުއާން މުބާރާތް ނިންމައި ބައިވެރީންނަށް ލިޔުން ދީފި

ވިލިތަރި ގުރުއާން މުބާރާތުގެ ބައިވެރިއަކަށް އިނާމު ދެނީ -- ފޮޓޯ/ ޕޮލިސް

ވިލިތަރި ގުރުއާން މުބާރާތް ނިންމައި ވަނަ ވަނައަށް ހޮވުނު ބައިވެރީންނަށް އިނާމު ދިނުމުގެ ރަސްމިއްޔާތު ބާއްވައިފި އެވެ.

މިއީ ވިލިމާލެ ޕޮލިހުން އިންތިޒާމްކޮށްގެން މި ރަމަޟާން މަހު ވިލިމާލޭގައި ބޭއްވި މުބާރާތެކެވެ.

މިމަހުގެ 21 ވަނަ ދުވަހުގެރޭ ވިލިމާލޭގައި ބޭއްވި ރަސްމިއްޔާތު ޝަރަފްވެރި ކޮށްދެއްވާފައި ވަނީ ކޮމިޝަނަރު އޮފް ޕޮލިސް އަލީ ސުޖާއު އެވެ.

މި ރަސްމިއްޔާތުގައި ވަނީ ކޮންމެ އުމުރު ފުރާއިން ބަލައިގެން ކިޔެވުމުގެ ގޮފިންނާއި ނުބަލާ ކިޔެވުމުގެ ގޮފިން ވަނަ ތަކަށް ހޮވުނު ކުދީންނަށް ހަނދާނީ ލިޔުމާއި ފައިސާގެ އިނާމު އަދި މުޅި މުބާރާތުން ދެ ގޮފިން ވަނަތަކަށް ހޮވުނު ކުދީންނަށް ހަނދާނީ ފިލަޔާއި ފައިސާގެ އިނާމު ހަވާލު ކޮށްފަ އެވެ.

އަދި މި ރަސްމިއްޔާތުގައި ވަނީ މުބާރާތުގައި ފަޑިޔާރުކަން ކޮށްދެއްވި ފަރާތް ތަކަށާއި މުބާރާތަށް އެކި ގޮތް ގޮތުން އެހީތެރިކަން ފޯރު ކޮށްދީފައިވާ ފަރާތް ތަކަށް ހަނދާނީ ލިޔުން ދީފަ އެވެ.

މި މަހު 18 އިން 19 އަށް ބޭއްވި މި މުބާރާތުގައި 95 ކުދީން ބައިވެރިވި އެވެ.

އެއީ ތިން އަހަރާއި ފަސް އަހަރާ ދެމެދުގެ އުމުރު ފުރާގެ 24 ކުދީންނާއި ހަ އަހަރާއި ނުވަ އަހަރާ ދެމެދުގެ އުމުރުފުރާގެ 36 ކުދީންނާއި 10 އަހަރާއި 13 އަހަރާ ދެމެދުގެ އުމުރުފުރާގެ 24 ކުދީންގެ އިތުރުން 14އަހަރާއި 17 އަހަރާ ދެމެދުގެ އުމުރުފުރާގެ 11 ކުދީންނެވެ.

ފުލުހުން