އުނދަގުލުގެ ތެރެއިންވެސް އީދަށް ދިއްލާލުމަކީ ރައީސް މުއިއްޒު ފެއްޓެވި ޗާލު ކަމެއް: އަރީޝް

އުނދަގުލުގެ ތެރެއިން ވެސް އީދަށް ދިއްލާލުމަކީ ރައީސް ޑރ. މުޙައްމަދު މުއިއްޒު ފެއްޓެވި ޗާލު ކަމެއް ކަމަށް މާލޭ ސިޓީ ކައުންސިލްގެ ޑެޕިއުޓީ މޭޔަރު މުޙައްމަދު އަރީޝް ވިދާޅުވެއް ޖެވެ.

އަރީޝް ވިދާޅުވީ އީދަށް މާލެ ސިޓީ، ވިލިމާލެ، އަދި ހުޅުމާލޭގައި ކުލަބޮކި ޖަހާ މުޅި މާލެ އޭރިޔާ ދިއްލާލުމަކީ މާލެސިޓީގެ މޭޔަރު ކަމުގައި ރައީސް ޑރ. މުޙައްމަދު މުއިއްޒު ހުންނެވިއިރު، ވަރަށް ކުލަ ގަދަކޮށް ކުރައްވަމުން ގެންދެވި މަސައްކަތެއް ކަމަށެވެ.

އަދި އޭރުގެ ސަރުކާރުން ކުރިމަތި ކުރުވި އުނދަގޫ ތަކާއި ދުއްތުރާ ތަކުގެ ތެރެއިން ވެސް އެކަން ކާމިޔާބު ކުރެއްވި ކަމަށާއި އެއީ ރައީސް މުއިއްޒު ކުރެއްވި ވަރަށް މުހިއްމު ކަމެއް ކަމަށް ވެސް އަރީޝް ވިދާޅުވި އެވެ.

"އަނެއްކާވެސް ކުރިއަށް މިދަނީ ސަރުކާރުން ސީދާ ރައީސް މުއިއްޒު ގެ އިރުޝާދުގެ ދަށުން މިކަން ފަށަން ސިޓީސް މިނިސްޓްރީއިން ނިކުންތަން. މާލެސިޓީ ކައުންސިލް އާ ކުރެވުނު މަޝްވަރާ ތަކަށްފަހު، އަޅުގަންޑުމެން ވެސް އެހީތެރިކަން އޮނަނާނެ،" އަރީޝް ވިދާޅުވި އެވެ.

މި އަހަރު އީދު އަލިން ރާއްޖޭގެ 65 ރަށް އެއްފަހަރާ މި މަހުގެ 29 ވަނަ ދުވަހުގެ ރޭ ދިއްލައިލުމަށް ވަނީ ހަމަޖެހިފަ އެވެ.

އީދު އަލި ދިއްލުމުގެ ބޮޑު އިވެންޓް ބޭއްވުމަށް ހަމަޖެހިފައި ވަނީ މި މަހުގެ 29 ވަނަ ދުވަހުގެ ރޭ ހުޅުމާލޭ ސެންޓްރަލް ޕާކުގަ އެވެ. މި އިވެންޓްގައި ރައީސުލްޖުމްހޫރިއްޔާ ބައިވެރިވެވަޑައިގަންނަވާނެ އެވެ.

މާލެ ސިޓީ ކައުންސިލް