ރާއްޖެ އިން މި އަހަރު ހައްޖަށް ދާ ދިވެހިންގެ ކަންކަން ބަލަހައްޓަން "އަމީރުލް ހައްޖު"ގެ ގޮތުގައި އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ހަމަޖައްސަވައިފި އެވެ.

އަމީރުލް ހައްޖުގެ ގޮތުގައި ވަޑައިގަންނަވާނެ ބޭފުޅުން ރާއްޖޭގައި ކަނޑައަޅަނީ އަބަދުވެސް ރައީސެވެ. އެ މީހަކީ އެ އަހަރު ރާއްޖޭން ހައްޖަށް ދާ އެންމެންގެ ކަންކަން ކައިރިން ބަލަހައްޓަން ރައީސް ކަނޑައަޅުއްވާ ބޭފުޅެކެވެ.

މިއަހަރު ރާއްޖެއިން ހައްޖަށްދާ، ހައްޖުވެރިންގެ ފަހު ފްލައިޓުގައި ދާ މީހުންނާއެކު އެޑިއުކޭޝަން މިނިސްޓަރު ސައުދީ އަށް ވަޑައިގަތުމަށް ވަނީ ހަމަޖެހިފަ އެވެ.

މި އަހަރު ރާއްޖެ އަށް ލިބުނީ 1،000 ހައްޖު ކޯޓާ އެވެ. މި އަހަރު ދިވެހި ހުރިހާ ހައްޖާޖީން ވެސް ހައްޖަށް ގޮސްފައިވަނީ ހައްޖު ކޯޕަރޭޝަންގެ ހަވާލުގަ އެވެ. ހައްޖު ކޯޓާގެ ތެރެއިން 50 ޖާގަ ސަރުކާރުން ވަނީ ނިކަމެތި ފަގީރުންނަށް ހާއްސަކޮށްފަ އެވެ.

މިއަހަރުގެ ހައްޖު ދުވަހަކީ މި މަހުގެ 15 ވަނަ ދުވަހެވެ.