އިމިގްރޭޝަން ކޮންޓްރޯލާ އަކަށް ފަސީހު އައްޔަން ކުރައްވައިފި

ކުރީގެ ކޮމިޝަނާ އޮފް ޕޮލިސް އަހުމަދު ފަސީހު --

ކޮންޓްރޯލާ ޖެނަރަލް އޮފް އިމިގްރޭޝަންގެ މަގާމަށް ކުރީގެ ކޮމިޝަނާ އޮފް ޕޮލިސް އަހުމަދު ފަސީހު އައްޔަނު ކުރައްވައިފި އެވެ.

ސަރުކާރުގެ ތަރުޖަމާން ހީނާ ވަލީދު ވަނީ މިކަން ކަށަވަރު ކޮށްދެއްވާފަ އެވެ.

ހީނާ މިރޭ ކުރެއްވި އެކްސް ޕޯސްޓެއްގައި ވިދާޅުވީ ކޮންޓްރޯލާ ޖެނެރަލް އޮފް އިމިގްރޭޝަންގެ މަގާމަށް ކޮމިޝަނާ އޮފް ޕޮލިސް (ރިޓަޔާޑް) އަހުމަދު ފަސީހު، ރައީސުލްޖުމްހޫރިއްޔާ އައްޔަން ކުރައްވައިފި ކަމަށެވެ.

ފަސީހު އެ މަގާމަށް އައްޔަން ކުރެއްވީ ސްޓޭޓް މިނިސްޓަރު ފެންވަރުގަ އެވެ.

ކޮންޓްރޯލާ ޖެނަރަލް އޮފް އިމިގްރޭޝަންގެ މަގާމަށް ފަސީހު އައްޔަން ކުރައްވާފައިވާއިރު، އެ މަގާމުގައި ކުރިން ހުންނެވި މުޙައްމަދު ޝަމްއާން ވަހީދު ވަނީ މިއަދު ވަކިކޮށްފަ އެވެ. ނަމަވެސް އޭނާ ވަކި ކުރާން ނިންމެވި ސަބަބު ސާފެއް ނޫނެ އެވެ.

ފަސީހު އަކީ ޔޫއެސް ޑިޕާޓްމަންޓް އޮފް ޖަސްޓިސް، ކުއަންޓިކޯ، ވާޖީނިއާގެ އެފްބީއައި ނޭޝަނަލް އެކަޑަމީ އިން އެފްބީއައި ޖެނެރަލް ކޯސް އޮފް އިންސްޓްރަކްޝަން ގްރެޖުއޭޓެކެވެ.

އޭގެ އިތުރުން އެބޭފުޅާ ވަނީ ކުރީގެ ރައީސް މުޙައްމަދު ނަޝީދުގެ ވެރިކަމުގެ އެންމެ ފަހު ދުވަހާ ހަމައަށް ކޮމިޝަނާ އޮފް ޕޮލިސްގެ މަގާމު އަދާ ކުރައްވާފަ އެވެ. އެއަށްފަހު، 2015 ވަނަ އަހަރު އެމްޓީސީސީގެ ޑެޕިއުޓީ ސީސީއޯކަން ވެސް ފަސީހު ކުރެއްވި އެވެ.

ރައީސް އޮފީސް އިމިގްރޭޝަން