ހައި ކޯޓުގެ އިސް ފަނޑިޔާރު ކަމަށް ކުރިމަތިލާން ހުޅުވައިލައިފި

ދިވެހި ރާއްޖޭގެ ސުޕްރީމް ކޯޓު -- ފޮޓޯ/ޓީއެމްޖޭ

ހައި ކޯޓުގެ އިސް ފަނޑިޔާރު ކަމުގެ މަގާމަށް ކުރިމަތިލާން ޖުޑިޝަލް ސާވިސް ކޮމިޝަން (ޖޭއެސްސީ) އިން މިއަދު ހުޅުވައިލައިފި އެވެ.

ހައި ކޯޓުގެ އިސް ފަނޑިޔާރު ކަމުގެ މަގާމު ހުސްވީ އެ މަގާމުގައި ހުންނެވި ސ. ހިތަދޫ، ބާޒީގެ އަލްއުސްތާޒު ހުސައިން ޝަހީދު، މިދިޔަ ބުދަ ދުވަހު ސުޕްރީމް ކޯޓުގެ ފަނޑިޔާރު ކަމަށް އައްޔަންކުރެއްވުމުންނެވެ.

އެ މަގާމުގެ ހަމައެކަނި ޝަރުތަކީ ހައިކޯޓުގެ ފަނޑިޔާރު ކަމުގެ ވަޒީފާ އަދާ ކުރައްވަމުން ގެންދަވާ ފަރާތަކަށް ވުމެވެ.

މި މަގާމަށް އަސާސީ މުސާރައިގެ ގޮތުގައި މަހަކު 47,700.00ރ. ލިބޭނެ އެވެ. އަދި ލިވިން އެލަވަންސަށް 18,000.00ރ. އާއި ރިސްކު އެލަވަންސުގެ ގޮތުގައި މަހަކު 3,300.00ރ. ލިބޭނެ އެވެ. އޭގެ އިތުރުން ރައްޔިތުންގެ މަޖިލީހުން ކަނޑައަޅާފައިވާ ގޮތުގެ މަތީން ހެލްތް އިންޝުއަރެންސާއި ފޯނު އެލަވަންސު ލިބި ދެވޭނެ އެވެ.

ޖުޑިޝަލް ސާވިސް ކޮމިޝަނުން ކުރި އިއުލާނުގައި ވަނީ އިސް ފަނޑިޔާރު ކަމަށް ކުރިމަތިލާ ފަރާތްތައް ނެގުމުގައި އަމަލު ކުރާނީ "ކޯޓު ތަކަށް އިސް ފަނޑިޔާރުން އައްޔަން ކުރުމުގައި އަމަލު ކުރާނެ ގޮތުގެ ގަވާއިދު" ގައިވާ ގޮތުގެ މަތީން ކަމަށެވެ.

މި މަގާމަށް ކުރިމަތިލާން ބޭނުންވާ ފަރާތް ތަކުން އެ ކަމަށް އެދުމުގެ ފުރުސަތު މި މަހުގެ 29 ވަނަ ދުވަހުގެ 12:00 އާ ހަމައަށް ވަނީ ހުޅުވާލައިފަ އެވެ.

ހައި ކޯޓުގެ ހިންގުން ވަގުތީ ގޮތުން މިހާރު ހަވާލު ކޮށްފައި ވަނީ ފަނޑިޔާރު މުޙައްމަދު ފައިސަލާ އެވެ.

ޖޭއެސްސީ