ކުރީގެ ސަރުކާރުން ހިންގި "ގެދޮރުވެރިޔާ" ސްކީމްގެ ދަށުން 4،000 ފްލެޓު ދޫކުރުމުގެ މަޝްރޫއު ހިންގުމުގައި އިސްކޮށް އުޅުނު ކުރީ ބައެއް ވެރިންގެ ގެއަށް އެންޓި ކޮރަޕްޝަން ކޮމިޝަން (އޭސީސީ) އިން ވަދެ، ބަލައި ފާސް ކުރަން ފަށައިފި އެވެ.

ކުރީގެ ވެރިންގެ ގެތައް އޭސީސީން ފާސްކުރަން ފެށީ ކޯޓު އަމުރެއްގެ ދަށުންނެވެ.

އެގޮތުން ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ގެއަށް ވެސް އޭސީސީން ވަދެ ފާސްކޮށް، އޭނާގެ ފޯނާއި ބައެއް އިލެކްޓްރޯނިކް ސާމާނު އޭސީސީގެ ބެލުމުގެ ދަށަށް ގެންގޮސްފައިވާ ކަން އެނގިފައިވެ އެވެ.

އަކްރަމްގެ އިތުރުން "ގެދޮރުވެރިޔާ" ސްކީމް ގައި މަސައްކަތް ކުރެއްވި ލިރުޣާމް ވަހީދާއި މުހައްމަދު އާރިފްގެ އިތުރުން އަހުމަދު ވިސާން ނަސީމްގެ ގެ ވެސް މިހާރު އޭސީސީން އަންނަނީ ފާސްކުރަމުންނެވެ.

އެ ކޮމިޝަނުން ބައެއް މީޑިއާތަކަށް، މިއަދު ހައުސިން މިނިސްޓްރީގެ ކުރީގެ ފްލެޓް ކޮމީޓީގެ ވެރިންގެ ގެތައް ފާސްކުރަމުން އަންނަނީ އޭސީސީން މިހާރު ތަހުގީގު ކުރަމުން އަންނަ ގެދޮރުވެރިޔާ ސްކީމުގެ 4،000 ފްލެޓު ދޫކުރި ގޮތުގެ މައްސަލައިގައި ކަމަށް މައުލޫމާތު ދީފައިވެއެވެ. އެގޮތުން ކޯޓު އަމުރެއްގެ ދަށުން ފާސްކުރަމުން އަންނަނީ މައްސަލައާ ގުޅުންހުރި ބައެއް ފަރާތްތަކާ ގުޅުންހުރި ބައެއް ތަންތަން ކަމަށް ބުނެފައިވެއެވެ.

ގެދޮރުވެރިޔާ ސްކީމްގެ ދަށުން 4،000 ފުލެޓް ދިނުމަށް ޝަރުތު ހަމަވާ މީހުންގެ ލިސްޓު އާންމު ކުރުމުން، ފުލެޓުތައް ދޫކުރުމުގައި މައްސަލަ އުޅޭ ކަމަށް ބުނެ، އޭސީސީން އޮތީ ޖިނާއީ ތަހުގީގެއް ވެސް ފަށައިފަ އެވެ. އެ ތަހުގީގާ ގުޅިގެން ގިނަ ދުވަސްތަކެއް ވަންދެން ފުލެޓު ދޫކުރުން މަޑު ޖެހިފައި އޮތުމަށް ފަހު މިދިޔަ އެޕްރީލް މަހުގެ 1 ގައި އޭސީސީން ވަނީ ބައެއް ކަންކަމަށް ރިއާޔަތްކުރުމަށް ފަހު ފުލެޓު ދޫކުރުމުގެ މަސައްކަތް ކުރިއަށް ގެންދަން ހުއްދަ ދީފަ އެވެ.

ހުއްދަ ދިން ނަމަވެސް އޭސީސީން ބުނެފައި ވަނީ 4،000 ފުލެޓު ލިބުނު މީހުންގެ ތެރެއިން 59.6 ޕަސެންޓް މީހުންގެ ޝަރުތު ހަމަނުވާ ކަމަށެވެ.