ރަސްމީ ދަތުރުފުޅެއްގައި ފޮރިން މިނިސްޓަރު ހަލީލު އިންޑިއާއަށް

2024: ފޮރިން މިނިސްޓަރު ހަލީލް ނިއުދިއްލީއަށް ވަޑައިގަތުން --

ފޮރިން މިނިސްޓަރު ޑރ. އަބްދުﷲ ހަލީލު ރަސްމީ ދަތުރުފުޅެއްގައި އިންޑިއާއަށް މިއަދު ވަޑައިގެންފި އެވެ.
އެމަނިކުފާނަށް ދިއްލީ އިން މަރުހަބާ ދަންނަވާފައިވަނީ ރާއްޖެއިން އިންޑިއާއަށް ކަނޑައަޅުއްވާފައި ހުންނަވާ ސަފީރު، އައިޝަތު އަޒީމާ އަދި އިންޑިއާގެ އެކްސްޓާނަލް އެފެއާޒްގެ އިސް އޮފިޝަލް އިންނެވެ.

މިއަދު ހަވީރު އިންޑިއާގެ ބޮޑުވަޒީރު ނަރެންދުރަ މޯދީ އިފްތިތާހު ކުރައްވާ ރައިސިނާ ޑައިލޮގްގެ 10 ވަނަ އެޑިޝަންގައި ހަލީލް ބައިވެރިވެވަޑައިގަންނަވާނެ އެވެ. މި އަހަރުގެ ރައިސިނާގެ ޗީފްގެސްޓްގެ ގޮތުގައި ބައިވެރިވެވަޑައިގަންނަވަނީ ނިއުޒީލެންޑްގެ ބޮޑުވަޒީރު ކްރިސްޓޮފާ ލަކްސަން އެވެ.

އޭގެ އިތުރުން މި އަހަރުގެ މި ޑައިލޮގްގެ ތެރެއިން މޫސުމަށް އަންނަ ބަދަލުތަކާ ގުޅޭ ޕެނަލް ޑިސްކަޝަންގައި މިނިސްޓަރު ހަލީލު ބައިވެރިވެވަޑައިގެން މޫސުމަށް އަންނަ ބަދަލުތަކާ ގުޅިގެން ހުރި ގޮންޖެހުންތަކާއި، މޫސުމީ ބަދަލުތަކަށް ފައިނޭންސިން ހަރުދަނާ ކުރުމުގެ މުހިއްމު ކަމަށް އަލިއަޅުވާލާ ވާހަކަފުޅު ދެއްކެވި ކަމަށްފޮރިން މިނިސްޓްރީން ބުންޏެވެ.

މި ދަތުރުފުޅުގައި، ހަލީލު، އިންޑިއާގެ މިނިސްޓާ އޮފް އެކްސްޓާނަލް އެފެއާޒް ޑރ. އެސް ޖައިޖަންކަރުގެ އިތުރުން ރައިސީނާ ޑައިލޮގްއަށް ވަޑައިގަންނަވާ އެހެނިހެން ގައުމުތަކުގެ ހާރިޖީ ވަޒީރުންނާއި، އިސްވެރިންނާއި ބައްދަލު ކުރައްވާނެ އެވެ.

ފޮރިން މިނިސްޓްރީ