ރައްޔިތުންގެ މަޖިލީހުގެ މެޖޯރިޓީ ލީޑަރަކަށް ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު، މައިނޯރިޓީ ލީޑަރަކަށް އެމްޑީޕީގެ ޕީޖީ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ހަމަޖައްސަވައިފިއެވެ.

މަޖިލީހުގެ މެޖޯރިޓީ އަދި މައިނޯރިޓީ ލީޑަރުން ކަނޑަައަޅުވައި، އެކަން އިއުލާނު ކުރެއްވީ މިއަދު ބޭއްވި މަޖިލީހުގެ ޖަލްސާގައި، ރިޔާސަތުން ދަންނަވާ ކަންތައްތަކުގެ ތެރެއިން މަޖިލީހުގެ ރައީސް، އަބްދުއްރަހީމް އަބްދުﷲއެވެ.

މަޖިލީހުގެ ޤަވައިދު ބުނާ ގޮތުން ނަމަ، މަޖިލީހުގައި މެޖޯރިޓީ ލީޑަރަކާއި މައިނޯރިޓީ ލީޑަރެއް ހުންނަން ޖެހެއެވެ. މެޖޯރިޓީ ލީޑަރަކީ މަޖިލީހުގައި އެންމެ ގިނަ ގޮނޑި ކޮންޓްރޯލް ކުރާ ޕާޓީގެ އެންމެ އިސް މެމްބަރެވެ. 20 ވަނަ މަޖިލީހުގައި އެންމެ ގިނަ ގޮނޑި ކޮންޓްރޯލް ކޮށްފައިވަނީ ވެރިކަން ކުރާ ޕީއެންސީންނެވެ. އެއީ 75 ގޮނޑިއެވެ.

މައިނޯރިޓީ ލީޑަރަކަކީ މަޖިލީހުގައި ދެވަނައަށް އެންމެ ގިނަ ގޮނޑި ތަމްސީލު ކުރާ ޕާޓީގެ އެންމެ އިސް މެމްބަރެވެ. 20 ވަނަ މަޖިލީހުގައި ދެވަނަ އަށް އެންމެ ގިނަ ގޮނޑި ކޮންޓްރޯލް ކުރަނީ އެމްޑީޕީންނެވެ. އެއީ 12 ގޮނޑިއެވެ.

އެހެން ކަމުން މަޖިލީހުގެ ރައީސް، އަބްދުއްރަހީމް ވަނީ މަޖިލީހުގެ މެޖޯރިޓީ ލީޑަރަކަށް ޕީއެންސީގެ ޕީޖީ ލީޑަރަކަށް އައްޔަން ކޮށްފައިވާ އިނގުރައިދޫ ދާއިރާގެ މެމްބަރު، އިބްރާހިމް ފަލާހް އަދި މައިނޯރިޓީ ލީޑަރަކީ އެމްޑީޕީގެ ޕީޖީ ލީޑަރަކަށް އައްޔަން ކޮށްފައިވާ ހިތަދޫ ދެކުނު ދާއިރާގެ މެމްބަރު، އިބްރާހިމް ނާޒިލް ކަން އިއުލާނު ކުރައްވާފައެވެ.

ފަލާހު ޕީއެންސީގެ ޕީޖީ ލީޑަރަކަށް އައްޔަން ކޮށްފައިވަނީ މިދިޔަ މަހުގެ 22 ވަނަ ދުވަހުއެވެ. އަދި ނާޒިލް އެމްޑީޕީގެ ޕީޖީ ލީޑަރަކަށް އައްޔަން ކޮށްފައިވަނީ މިދިޔަ މަހުގެ 27 ވަނަ ދުވަހުއެވެ.