މަންދީ ގަޔަށް ކަޅުތެޔޮ ޖެހުން ހަރުކަށި އިބާރާތުން ކުށްވެރި ކުރަން: މެޑަމް ސާޖިދާ

ރައީސް އަނބިކަނބަލުން މެޑަމް ސާޖިދާ މުޙައްމަދު -- ފޮޓޯ/ ރައީސް އޮފީސް

އެމްޑީޕީގެ އެކްޓިވިސްޓު މަރިޔަމް ޒުބައިރު (މަންދީ)ގެ ގަޔަށް ކަޅުތެޔޮ ޖެހުން އެންމެ ކަރުކަށި އިބާރާތުން ކުށްވެރި ކުރައްވާ ކަމަށް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ވިދާޅުވެއްޖެ އެވެ.

މަންދީގެ ގަޔަށް ކަޅުތެޔޮ ޖަހައިފައި ވަނީ، އެމްޑީޕީން ރޭ މާލޭގައި ކުރިއަށް ގެންދިޔަ މުޒާހަރާގައި ބައިވެރިވުމަށްފަހު، އޭނާ ސައިކަލުގައި ދުއްވާފައި ދަނިކޮށް ހެލްމެޓް އަޅައިގެން ތިބި ބައެކެވެ.

މި އަމަލު ކުށްވެރި ކުރައްވައި މެޑަމް ސާޖިދާ ކުރެއްވި އެކްސް ޕޯސްޓެއްގައި ވިދާޅުވީ އެއްވެސް މީހަކަށް މިފަދައިން ހަމަލާދީ އަދި އުނދަގޫ ކުރުމަކީ ބަލައިގަނެވޭ ކަމެއް ނޫން ކަމަށެވެ.

އަދި މިވަގުތުގައި ކަންކަން ހަލަބޮލި ނުކޮށް، އިންސާފު ގާއިމު ކުރުމަށް ޖާގަ ދިނުމަށް ވެސް އެ ކަމަނާ ވަނީ އިލްތިމާސް ކުރައްވާފަ އެވެ.

"ރޭގައި އެމްޑީޕީގެ އެކްޓިވިސްޓް މަރިޔަމް ޒުބައިރުގެ ގަޔަށް ކަޅުތެޔޮ ޖެހުން އަޅުގަނޑު އެންމެ ހަރުކަށު އިބާރާތުން ކުށްވެރިކުރަން، އެއްވެސް މީހަކަށް މިފަދައިން ހަމަލާދީ އަދި އުނދަގޫ ކުރުމަކީ ބަލައިގަނެވޭ ކަމެއްނޫން، މިވަގުތުގައި ކަންކަން ހަލަބޮލި ނުކުރައްވާ، އިންސާފު ގާއިމު ކުރުމަށް ޖާގަ ދެއްވުމަށް އަޅުގަނޑު އިލްތިމާސްކުރަން،" މެޑަމް ސާޖިދާ ވިދާޅުވި އެވެ.

މަންދީ ގަޔަށް ކަޅުތެޔޮ ޖަހާފައި މިވަނީ ރައީސް ޑރ. މުޙައްމަދު މުއިއްޒުގެ ދަރިކަލަކާ ގުޅޭ ގޮތުން މަންދީ ދެއްކި ވާހަކައެއްގެ މައްސަލަ ހޫނުވެފައި ވަނިކޮށެވެ. އަދި އެ ވާހަކަތަކާ ގުޅުވައިގެން ރައީސްގެ އާއިލާ އިން ވަނީ އޭނާގެ މައްޗަށް ދައުވާ ކުރާން ވެސް ނިންމަވާފަ އެވެ.

މެޑަމް ސާޖިދާ