ރައީސްގެ އިސްލާމީ ދާއިރާތަކުގެ ވައުދުތަކުގެ ތެރެއިން 14 މަޝްރޫއެއް ފަށަން ސޮއިކޮށްފި

ރައީސް ޑރ. މުޙައްމަދު މުއިއްޒުގެ ވައުދުތަކުގައި ހިމެނޭ އިސްލާމީ ދާއިރާތަކުގެ މަޝްރޫއުތަކުގެ ތެރެއިން 14 މަޝްރޫއެއްގެ އަމަލީ މަސައްކަތް ފެށުމަށް ކުންފުނިތަކާއެކު މިއަދު ސޮއިކޮށްފި އެވެ.

އިސްލާމީ މަރުކަޒުގައި މިއަދު ބޭއްވި ރަސްމިއްޔާތުގައި ވަނީ 14 މަޝްރޫއުއެއްގެ އެއްބަސްވުމުގައި ސޮއިކޮށްފައެވެ. އެއީ 2 ރަށެއްގައި ގުރުއާނާއި ބެހޭ މަރުކަޒުގެ ގޮފި އިމާރާތް ކުރުމަށާއި އިސްލާމީ މަރުކަޒެއް އިމާރާތް ކުރުމުގެ އިތުރުން 11 ރަށެއްގައި މިސްކިތް އިމާރާތް ކުރުމަށެވެ.

މި މަޝްރޫއުތަކުގެ ތެރެއިން ފެނަކަ ކޯޕަރޭޝަނާ ހަވާލު ކުރީ 11 މަޝްރޫއުކެއެވެ. އަދި  އެމްޓީސީސީއަށް ތިން މަޝްރޫއު އެވެ.

އިސްލާމިކް މިނިސްޓްރީގެ ފަރާތުން މި މަޝްރޫއުތަކުގައި ސޮއިކުރެއްވީ މިނިސްޓަރު ޑރ. މުޙައްމަދު ޝަހީމް އަލީ ސައީދެވެ. ފެނަކައިގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު މުޙައްމަދު ނަޖާހު އެވެ. އަދި އެމްޓީސީސީގެ ފަރާތުން އެކުންފުނީގެ މެނޭޖިން ޑިރެކްޓަރު އަހުމަދު ސައުދީ އެވެ.

މިއަދު ސޮއި ކުރި މަޝްރޫއުތަކުގެ ތެރެއިން މާބައިދޫ، އޮޅުވެލިފުށި، ހިރިލަންދޫ، ފޭދޫ، ހެނބަދޫ، އިނގުރައިދޫ، ނެއްލައިދޫ އަދި ކުޑަރިކިލުގައި ހިންގައި މަޝްރޫތަކަކީ 365 ދުވަހުގެ ތެރޭގައި ނިންމުމަށް ފެނަކައަށް ހަވާލުކުރި މަޝްރޫތަކެކެވެ. އޭގެ އިތުރުން ށ. ފޯކައިދޫގެ އިސްލާމީ މަރުކަޒަކީ 900 ދުވަހުގެ ތެރޭގައި ނިންމުމަށް ހަވާލުކުރި މަޝްރޫއެކެވެ. އަދި ނޫމަރާ އާއި ވޭމަންޑޫ މިސްކިތަކީ 550 ދުވަހުގެ ތެރޭގައި ނިންމުމަށް ހަވާލުކުރެވިފައިވާ މަޝްރޫއެކެވެ.

މުޅިއެކު 365 ދުވަހުގެ ތެރޭގައި ނިންމުމަށް އެމްޓީސީސީ އާ ހަވާކުރީ ތިން މަޝްރޫއެކެވެ. އެއީ ހއ. ބާރަށުގެ އިތުރުން ބ. މާޅޮސް އަދި އއ. ފެރިދޫގައި 500 މީހުންގެ ޖާގައިގެ މިސްކިތެއް އިމާރާތްކުރުމެވެ.