އެޗްޑީސީން ހުޅުމާލޭގެ އެކި ސަރަހައްދުތަކުގައި ރޯދަ ވީއްލުމެއް ބާއްވަނީ

ހުޅުމާލޭގައި ބޭއްވި ރޯދަވީއްލުމެއްގެ ތެރެއިން -- ފޮޓޯ/ އެޗްޑީސީ

އެޗްޑީސީ އާއި ހުޅުމާލޭގައި ދިރިއުޅޭ މީހުންނާ ގުޅިގެން "އަވައްޓެރި ރޯދަ ވީއްލުން" ނަމުގައި ރޯދަ ވީއްލުމެއް ބާއްވަން ނިންމައިފި އެވެ.

ހުޅުމާލޭގެ އެކި ސަރަހައްދު ތަކަށް ބަހާލައިގެން ރައްޔިތުންނާއި އެޗްޑީސީ އަދި ހުޅުމާލޭގެ ނެއިބަހުޑް ޕޮލިސް ގުޅިގެން ކުރިއަށް ގެންދާ މި ހަރަކާތުގެ މަގުސަދަކީ ދިވެހީންގެ މެދުގައި ޒަމާނުއްސުރެ، އޮންނަ އެކުވެރި ކަމާއި އެއްބައިވަންތަ ކަން އާލާކޮށް ދިރުވުން ކަމަށް އެޗްޑީސީން ބުންޏެވެ.

"އަވައްޓެރި ރޯދަ ވީއްލުން" ރޭވިފައި ވަނީ ރޯދަ މަހުގެ އެކި ދުވަސް ތަކުގައި ހުޅުމާލޭގެ އެކި ސަރަހައްދު ތަކުގައި ކުރިއަށް ގެންދާ ގޮތަށް، އެގޮތުން، ފުރަތަމަ ރޯދަ ވީއްލުން ބޭއްވުމަށް ހަމަޖެހިފައި ވަނީ އަންނަ ހޮނިހިރު ދުވަހު، ހުޅުމާލޭ ފޭސް އެކެއްގެ ހުރަވީ ސުކޫލު ކުރިމަތީގައި އޮންނަ، 'ރަނައުރާ މަގުގައި، އެޗްޑީސީން ބުންޏެވެ.

އެޗްޑީސީގެ ހެޑް އޮފް މާކެޓިން އެންޑް ޕީއާރު ޑިޕާޓްމަންޓް ހަސަން ޝަހީދު ވިދާޅުވީ ހުޅުމާލޭގެ ރައްޔިތުންނަކީ އަބަދުވެސް ރައްޔިތުންނާ ގުޅުން ހުރި މިފަދަ ކަން ކަމުގައި އެ ކުންފުންޏަށް އެއްބާރުލުން ދޭ ބައެއް ކަމަށެވެ.

އެޗްޑީސީގެ އަމާޒަކީ ކުރިއަށްއޮތް ތަނުގައި ވެސް ހުޅުމާލޭގެ ރައްޔިތުންނާ ގުޅިގެން މިފަދަ ގިނަ ހަރަކާތް ތަކެއް ކުރިއަށް ގެންދިޔުމާއެކު، ހުޅުމާލެއަކީ ގުޅުން ބަދަހި ރައްޔިތުން ދިރިއުޅޭ ހިތްފަސޭހަ ތަނަކަށް ހެދުން ކަމަށް ވެސް އެ ކުންފުނިން ބުންޏެވެ.

އެޗްޑީސީ