ހަތަރު ސިއްހީ މަރުކަޒެއްގައި އައު އިމާރާތް ތަރައްގީ ކުރާން އެމްޓީސީސީއަށް

އަތޮޅުތެރޭގެ ހަތަރު ސިއްހީ މަރުކަޒެއްގައި އައު އިމާރާތް ތަރައްގީ ކުރުމުގެ މަޝްރޫއު ސަރުކާރުން އެމްޓީސީސީ އާ މިއަދު ހަވާލު ކޮށްފި އެވެ.

މި މަޝްރޫއުތައް ހަވާލު ކުރުމަށް ބޭއްވި ރަސްމިއްޔާތުގައ، އެމްޓީސީސީގެ ފަރާތުން ސޮއި ކުރެއްވީ މެނޭޖިން ޑިރެކްޓަރު (ރިޓަޔާޑް) ޑެޕިއުޓީ ކޮމިޝަނަރު އޮފް ޕޮލިސް އަޙްމަދު ސައުދީއެވެ. އަދި ހެލްތް މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރު އިސްމާއިލް އަބްދުﷲ އެވެ.

މި މަޝްރޫއުގެ ދަށުން، ތ. ވިލުފުށީ ހޮސްޕިޓަލާއި ވ. ފެލިދޫ ހޮސްޕިޓަލަށް 37 އެނދު އެކުލެވޭ 76،175 އަކަމީޓަރުގެ މެއިން ބިލްޑިން އަކާއި، 2،563 އަކަމީޓަރުގެ ސާވިސް ބްލޮކަކާއި، 7،147 އަކަމީޓަރުގެ އެކޮމޮޑޭޝަން ބްލޮކެއް ހިމެނޭ އައު އިމާރާތެއް އިތުރު ކުރާނެ އެވެ. އަދި، ށ. މާއުނގޫދޫ ސިއްހީ މަރުކަޒާއި ނ. ފޮއްދޫ ސިއްހީ މަރުކަޒަށް 16 އެނދުގެ ޖާގަ އެކުލެވޭ 15،650 އަކަމީޓަރުގެ އިމާރާތެއް ވެސް އިތުރު ކުރާ ގޮތަށް ނިންމާފައިވެ އެވެ.

ތ. ވިލުފުށީ އަދި ވ. ފެލިދޫ ހޮސްޕިޓަލްގެ އައު އިމާރާތް ތަރައްގީ ކުރުމުގެ މަޝްރޫއު އެމްޓީސީސީ އާ ހަވާލު ކުރީ 105.13  މިލިއަން ރުފިޔާ، އަދި 105.3 މިލިއަން ރުފިޔާ އަށެވެ.

މި ދެ މަޝްރޫއު އަކީ 540 ދުވަސް ތެރޭ ނިންމުމަށް ހަވާލު ކުރި ދެ މަޝްރޫއު އެވެ.

މީގެ އިތުރުން، ށ. މާއުނގޫދޫ އަދި ނ. ފޮއްދޫ ސިއްހީ މަރުކަޒުގެ އައު އިމާރާތް ތަރައްގީ ކުރުމުގެ މަޝްރޫއު އެ ކުންފުންޏާ ހަވާލު ކުރީ 27.2 މިލިއަން ރުފިޔާ، އަދި 26.8 މިލިއަން ރުފިޔާއަށެވެ.

މި ދެ މަޝްރޫއު އަކީ 360 ދުވަސް ތެރޭ ނިންމުމަށް ހަވާލު ކުރި ދެ މަޝްރޫއު އެކެވެ.