ކުޅުދުއްފުށީގައި ދަމަނަވެެއްޓެއް އިމާރާތް ކުރަން އާރުޑީސީއަށް

ކުޅުދުއްފުށީގައި ދަމަނަވެއްޓެއް އަޅަން އާރުޑީސީއާ ހަވާލުކުރުން --

ހދ. ކުޅުއްދުއްފުށި ސިޓީގައި ދަމަނަވެއްޓެއް ގާއިމްކުރުމަށް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) ހަވާލު ކޮށްފި އެވެ.

ރޭ މިނިސްޓްރީގައި ބޭއްވި ރަސްމިއްޔާތެއްގައި މަސައްކަތުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރު އިސްމާއީލް ޝަރީފް އެވެ. އަދި އާރުޑީސީގެ ފަރާތުން ސޮއި ކުރެއްވީ މެނޭޖިންގް ޑިރެކްޓަރު ބްރިގޭޑިއާ ޖެނެރަލް ރިޓަޔާޑް އަލީ ޒުހެއިރު އެވެ.

ދޮޅު އަހަރު ތެރޭގައި ނިންމާގޮތަށް އެ ކުންފުންޏާ ހަވާލުކުރި މި ޕްރޮޖެކްޓްގެ ޖުމުލަ އަގަކީ 23,113,061.08 ރުފިޔާ އެވެ.

މިއީ މާލެއިން ބޭރު ރަށެއްގައި ހަދާ ފުރަތަމަ ދަމަނަވެއްޓެވެ.

ހެލްތް މިނިސްޓްރީން ބުނިގޮތުގައި މުޅިއެކު ދެ ފަންގިފިލާއަށް ހަދާ، މި އިމާރާތުގައި މާލޭގައި ހުރި ދަމަނަވެށިން ދޭ ހުރިހާ ހިދުމަތެއް ދޭނެއެވެ.

މިނިސްޓްރީން ބުނީ މިތަނުން ދޭ ހިދުމަތުގެ ތެރޭގައި ވެކްސިން ދިނުމާއި، ކުޑަކުދިން ހެދިބިޑުވުމުގެ މައުލޫމާތު އެއްކުރުމާއި ޓޮބޭކޯ ސިޒޭޝަން ޕްރޮގްރާމް ހިންގުމުގެ އިތުރުން އެކި އެކި ސިއްހީ ކަންކަމާއި ގުޅޭގޮތުން ހޭލުންތެރިކަމުގެ ޕްރޮގްރާމް ތައްވެސް ހިންގާނެއެވެ.

ކުޅުދުއްފުށި