"ޕްރިޒަން އޮފިސަރުން ކުރަނީ ނަފުސާނީ ގޮތުން ވަރުބަލިކަން ލިބޭ މަސައްކަތެއް"

ޑރ. މަރިޔަމް މާރިޔާ --

މޯލްޑިވްސް ކަރެކްޝަން ސާވިސް (އެމްސީއެސް) ގެ ޕްރިޒަން އޮފިސަރުން ކުރަނީ ނަފުސާނީ ގޮތުން ވަރުބަލިކަން ލިބޭ މަސައްކަތެއް ކަމަށް ދަނޑުވެރިކަމާ ބެހޭ ވަޒީރު ޑރ. މަރިޔަމް މާރިޔާ ވިދާޅުވެއްޖެ އެވެ.

މާރިޔާ މިހެން ވިދާޅުވީ މޯލްޑިވްސް ކަރެކްޝަނަލް ސާވިސް އިން "ކަސްޓޯޑިއަލް މެނޭޖްމަންޓް އެންޑް ސެކިއުރިޓީ" ޕްރޮގްރާމް ގެ 12 ވަނަ ބެޗްގެ ދަސްވެނިވުމުގެ ރަސްމިއްޔާތު ޝަރަފްވެރިކޮށްދެއްވާ ވާހަކަފުޅު ދައްކަވަމުންނެވެ.

މާފުށީ ޖަލުގައި ރޭ ބޭއްވި ރަސްމިއްޔާތުގައި ޑރ. މާރިޔާ ވިދާޅުވީ މި މަސައްކަތަކީ ނަފްސާނީ ގޮތުން ވަރުބަލިކަން ލިބޭ މަސައްކަތެއްކަމަށާއި އެ މަސައްކަތުގައި އުޅޭއިރު، އިހުލާސްތެރިކަމާއި ތެދުވެރިކަމަކީ މުހިއްމު ކަމެއް ކަމަށެވެ. އަދި ދަތި އުދަނގޫ ކޮންމެ މާހައުލެއްގައި ކެތްތެރިކަމާއި ވަފާތެރިކަން ދަމަހައްޓަންޖެހޭ ކަމަށް ވެސް ވިދާޅުވި އެވެ.

މީގެ އިތުރުން މިނިސްޓަރު ވިދާޅުވީ ތަމުރީނަކީ މަސައްކަތުގެ އަސާސް ކަމަށާއި މި ފަދަ ތަމުރީން ތަކުން ދަސްކުރާ ކަންކަން ހަނދާނުގައި ބަހައްޓައިގެން ވަޒީފާގައި ލިބޭ ފިލާވަޅުތަކާއެކު ކުރިއަށް ދިޔުމަކީ ވަރަށް މުހިއްމު ކަމެއް ކަމަށެވެ.

މި ރަސްމިއްޔާތުގައި މިނިސްޓަރު ވަނީ ކާމިޔާބު ކަމާއެކު ކޯސް ފުރިހަމަކުރެއްވި އޮފިސަރުންނަށް ވަރަށް ހޫނު މަރުހަބާއެއް ދަންނަވާފަ އެވެ.

މުޅިއެކު 15 ހަފްތާއަށް ކުރިއަށްދިޔަ މި ޕްރޮގްރާމްގެ މި ބެޗްގައި އެމްސީއެސްގެ ވަޒީފާއާ އަލަށް ގުޅުނު 39 ޓްރޭނީން ބައިވެރިވެފައިވާއިރު، އެކި ސަބަބުތަކާ ހުރެ ޓްރޭނިން ފުރިހަމަ ކޮށްފައި ވަނީ 33 އޮފިސަރުންނެވެ.

ނިސްޓްރީ އޮފް އެގްރިކަލްޗާ އެންޑް އެނިމަލް ވެލްފެއާ