މާލެ ސިޓީގެ ޑެޕިއުޓީ މޭޔަރުކަމުން ނަރީޝް އިސްތިއުފާ ދެއްވައިފި

މާލޭ ސިޓީގެ ޑެޕިއުޓީ މޭޔަރުކަމުގެ މަގާމުން އަހުމަދު ނަރީޝް އިސްތިއުފާ ދެއްވައިފި އެވެ.

ނަރީޝް މިއަދު ކުރެއްވި އެކްސް ޕޯސްޓެއްގައި ވިދާޅުވީ ގައުމާއި ރައްޔިތުންނަށް އެހެން ހައިސިއްޔަތަކުން ހިދުމަތް ކުރާން ފުރުސަތު ލިބުމާއި ގުޅިގެން މާލެ ސިޓީ ކައުންސިލްގެ މާފަންނު މެދު ދާއިރާގެ ކައުންސިލް މެންބަރުކަމުންނާއި، މާލެ ސިޓީ ޑެޕިއުޓީ މޭޔަރު ކަމުން މިއަދުން ފެށިގެން އިސްތިއުފާ ދީފައިވާ ކަމަށެވެ.

ނަރީޝް ފޮނުއްވި އިސްތިއުފާގެ ސިޓީގައި ވިދާޅުވީ، 2021 ވަނަ އަހަރު ބޭއްވި ފޯރި ގަދަ ލޯކަލް ކައުންސިލު އިންތިހާބުގައި މާފަންނު މެދު ދާއިރާގެ ރައްޔިތުން އޭނާއާ މެދު ބެހެއްޓި ގާތްކަމާއި އިތުބާރުކޮށް، ވަރަށް ތަނަވަސް އަގުލަބިއްޔަތަކުން އިންތިހާބު ކޮށްދިނީތީ ޝުކުރު އަދާ ކުރާ ކަމަށެވެ. އަދި އޭނާ އެ މަގާމަށް އިންތިހާބު ކުރާން ތާއީދުކޮށް ވޯޓު ދެއްވި ކައުންސިލަރުންގެ އިތުރުން މިހާރު މޭޔަރު ކަމުގައި ހުންނެވި އިދިކޮޅު އެމްޑީޕީއަށް ނިސްބަތްވެވަޑައިގަންނަވާ އާދަމް އާޒިމްގެ އަރިހުން ލިބިވަޑައިގެންނެވި ފިލާވަޅުތަކަށް ވެސް ނަރީޝް ޝުކުރު އަދާ ކުރެއްވި އެވެ.

އިސްތިއުފާގެ ސިޓީގައި ރައީސް ޑރ. މުޙައްމަދު މުއިއްޒު ބެހެއްޓެވި ގާތް ކަމަށާއި އެ މަނިކުފާނު ދެއްވި އެހީތެރިކަމަށް ވެސް ނަރީޝް ޝުކުރު އަދާކުރައްވާފައިވެ އެވެ.

މާލޭ ސިޓީގެ ޑެޕިއުޓީ މޭޔަރު ކަމަށް ނަރީޝް އިންތިހާބު ކުރީ 2021 ވަނަ އަހަރުގެ ޖޫން 21ގަ އެވެ.

މާލެ ސިޓީ ކައުންސިލް