ޑުރަގު އޮޕަރޭޝަނެއްގައި ވިލިމާލެއިން ބަޔަކު ހައްޔަރުކޮށްފި

ވިލިމާލޭގައި ހިންގި މަސްތުވާތަކެތީގެ އޮޕަރޭޝަނެއްގައި ބަޔަކު ހައްޔަރުކޮށްފި އެވެ.

ކައުންޓާ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން ހިންގި މި އޮޕަރޭޝަނުގައި ހައްޔަރުކޮށްފައި ވަނީ ތ. ގާދިއްފުށި ކެނެރީގެ، އިބްރާހީމް އިމާދު، 30 އާއި މއ. ވިންޑްސްޓާ ،1 މުޙައްމަދު ސިމްރާހު،43 އަދި ގދ. ރަތަފަންދޫ ޒަމާނީއާގެ، ސަލާހު ޝިހާބް، 45، އެވެ.

ފުލުހުން ބުނީ އެމީހުން ހައްޔަރު ކުރީ މި މަހުގެ ނުވަ ވަނަ ދުވަހު ކަމަށާއި އެ މީހުން ހައްޔަރުކޮށް ބަލައިފާސްކުރިއިރު މަސްތުވާތަކެތި ކަމަށް ބެލެވޭ ތަކެތި ފެނިފައިވާ ކަމަށެވެ.

މި ތަކެތީގެ ވަގުތީ ބަރުދަނަކީ 57.78 ގުރާމް ކަމަށް ފުލުހުން ބުނެފައިވެ އެވެ.

މީގެ އިތުރުން، މަސްތުވާތަކެތީގެ ވިޔަފާރިކޮށްގެން ހޯދާފައިވާ ކަމަށް ބެލެވޭ 241000 އަށްވުރެ ގިނަ ދިވެހި ރުފިޔާ ފެނިފައިވާ ކަމަށް ފުލުހުން ބުންޏެވެ.

މި މައްސަލައާ ގުޅިގެން އެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން މުޙައްމަދު ސިމްރާހު އާއި ސަލާހު ޝިހާބް 15 ދުވަހަށް ބަންދުކުރުމަށް އަމުރުކޮށްފައިވާއިރު އިބްރާހީމް އިމާދު ކޯޓުން ވަނީ ދޫކޮށްލާފަ އެވެ.

އެހެންވެގެން، އެ މައްސަލަ އިސްތިއުނާފުކޮށްދިނުމަށް އެދި ޕްރޮސެކިއުޓާ ޖެނެރަލްގެ އޮފީހަށް ފޮނުވާފައި ކަމަށް ވެސް ފުލުހުން ބުންޏެވެ.